国内统一刊号:CN53-0013 德宏团结报社出版电话:2111017传真:2129594广告联系电话:2123901






2022年01月14日

Zaizo menoq woqgan woq e paqzhvi zo

Wunbvong Zaizo menoq woqgan woq e paqzhvi zo xi gi, anvam mautoq cangpun mai mopo paushuq yu, momyvi byizam tung lui, woq jo lo e menoq ngvut ra.

Zaizo amyvu wui e menoq xi chung zhang myo dik be, mangzo mangzhang chung, myiwe zo langdoq byilo zhang wolan ma hang, myiwe wui welam toq, angvut zhang zumgo zatbyvaq byvaq gvun zhang ka laming e zhaq zang chung le.

Asu mu, myvipo shui woq hi lo woqgan woq ri gi, gankum hicuq dvo, batdvok cuq dvo mu lui, hikloq dunggoq zo ma gan idong tong le. ladong gi doyup gan, ladong gi ngvat dvusut gan.

Haumai, hikloq dunggoq zo ma qingzum ganchang hi ge dvo mu, daqkong ma qutzhoi gvat lui gankum ma gve gvat mu ganding lang she jo lo mu, batdvok ma qi nangzing dvo lui, tungwui zhoi gvat pyidum ma zhichi nozhung shogvuq hebyvi langdvui mu, doyup gan ma ngvatcho zhoi, ngvatdvu ngvatsut gan ma woqmo zhoi mu ngvatyu yu. ngvatdvu ngvatsut banyu e mai memik ngvat zo dum yu, memik ngvatzo ban yu zhang koguq ngvatmo dum yu, haubve wo ban shiding e mai gi, zai angvut zhang ne 6-7kat ri hiwoq jvam gvat le. Haumai sheq qingnoq loqnyvui labun hingzo gvo woqgvat mu, memik mik, komyvi gvat, kozhvam, singgoq miknoq mikne, ko banbo, quigong, kolung, zhingpoq bo, kodvui xi 11zhung ko ban gvat mai sheq gansho woq lo be.

Nganvung Wunbvong amyvu zo wui gi woqgan zhimu gvam mvoq gvam shigut bang ngvut le, banshoq bang Zaizo menoq woq lo tung king paqzhvi ri gapgap sapsap nangzam abyit advo myvi lo za chom chung jo lo shang. (Gvasu Lapai Nangjong)

--> 2022-01-14 5 5 德宏团结报载瓦 content_32692.html 1 Zaizo menoq woqgan woq e paqzhvi zo /enpproperty-->