国内统一刊号:CN53-0013 德宏团结报社出版电话:2111017传真:2129594广告联系电话:2123901






2022年01月14日

Gaulam byanghing wun

“Lang gvoq pik ra, Manzhum yvang ri toq le nvang aq”Gaulam byanghing wun Ngoyang ri lvom dai gvat be. Ngoyang qang- shit wang lo be. Maliq wui gashut pik gvat be, Ngoyang dum toq lo mu:“Gaulam byang- hing wun e, Manzhum zau mang dai ri wui raurau nvang gvat aq ga, nang hai o ri hai byi ra ”ga.

“Manzhum zau mang ri lo daijvo aq, ngo manzhum ladu o ra.” Gaulam byanghing wun Ngoyang ri qangshit gvat be. Ngoyang qang daijvo dum wang lo be.

Laqing zhang Dvaugvop dum toq le be: “Gaulam byanghing wun e, Manzhum zaumang dai ri ngun o ri ngun byi ra, hing ri byi le, manzhum gi awo byi ga, wui raurau pik gvat aq ”ga.

“Ngun ri ao, hing ri ao, manzhum yvang ladu o ra ngvu dai aq, hau angvut zhang Maliq zup wuitum pik gvan lui manzhum yvum ma zhap wang lo bira”Gaulam byang hing wun Dvaugvop ri qang lvom shit gvat be.

Dvaugvop wang lo be.Gaulam byang hing wun Sho eq cingzvuq wa ri Maliq tumtang ma gaulam tanmo su sho eq wui byik nvang be. Haukun zhang, tumgung ma wui au su zvu lo be. Hautang ma Maliq zup tum ma wuigung mai iqam jo zhang, Manzhum gong mo nvutmui lakot, qui larong e wui- gung ma le yap gvat be.“Gaulam byanghing wun gi kayuq? Dai e haimu adat jo e?” ngvu ga.

“Ngo ngvut le, manzhum ladu han le dvui byi aq.” ngvu ga.

“Nyvo e, adat jo e wacang nang ashi nau zhang akui raurau dvau aq.”

“Dang kidai myo, manzhum ladu rau le dvui byi aq”Gaulam byanghing wun gaulam lvapsham “qot” ga she toq lui, shamlvap lvap shit be.“Hausu angvut zhang nga gaulam lvapsham eq manzhum yvum ri zhappyi be ra!” ngvu ga.

Manzhum mang Gaulam byanghing wun e dang jo zhang, wang ma byang lo e i nvikyo nau lui, “Wacang nang gi shi nau be, shi nau be”ga, Gaulam byanghing wun ri mutdvang gvat be, Manzhum e soq kamyvo wum bo lvang ase, tumyam ma luqmo sikgam nyvau- nyvau mutdvang gvat, yvang numnang wui ri sikhaq qap su ceming mutdvang gvat be, Gaulam byanghing wun gi gaulam lvapsham myi ma gingging tuqzing dvo lui ladun adui, Manzhum mang“wa……”ga nvikmo yo lui gi nvutmai myi latui dum mut toq gvat be, myi- tui hau tumyam ma lo dangdap eq tumyam ma sikmo luqzing qopqop nye lui myimvop lajop jop, Gaulam byanghing wun gaulam lvapsham lvap su pyat lui lving nyi zhang, yvang nam ma myitui awo tep, myitui ban dap lai eq Manzhum mang wu gvat ri, Gaulam byanghing wun gege za yap dvo, gung ma mau nyvoq lakat azang nye, Manzhum mang nvikyo mehe shi lui, laizo lving mu Gaulam byanghing wun ri zan dang jo lo be.Tumtang ma, Gaulam byanghing wun eq Manzhum mang maunun myidui, myizik myvamyva, wuizhap pyipyi laqui e zanlvum zhang, Gaulam byanghing wun myi be: “Manzhum mang e, nang wo zan ung ri gi ngo shi be, ngo ung zhang gi manzhum ladu rau dvui byi aq!”

Manzhum mang dangtang kun dvo be: “Gaulam byanghing wun e, nang hai wa maukung tung e wum-o bo le, kinyi nang ung ri gi ngo manzhum dvui byi ra, ngo ung zhang nang nga e kumzung kui za gvut aq” ngvu ga.

Gaulam byanghing wun jo gibu be: “Manzhum mang nang dai be dang gi qak le, byetoq sigvan gi adat shum ngum” ngvu ga.

“Ngo dai zhe gvut zhe, lazvui mvau zhang hu mau eq le gun shang!” maushut loqnyvui dvun lui dum zan wang dang lo be.

Yvangnvik iyuq laqui dum zan lvum zhang, Gaulam byanghing wun eq Manzhum mang e nvutmui dvikdvik hepyit byi, quirong zvotzvot zhvepyit byi, Manzhum mang awo ung loq, haumai Manzhum mang:“Gaulam byanghing wun e, kizan loq, nang ri manzhum ladu dvui she byi ra” ngvu ga.

Manzhum mang azan ung loq mu Gaulam byanghing wun ri bvai be. Haumu lui hu labyvi wuimun shut ma manzhum zo ladu dvui she zhai be. (18)

(Sop gvazving su Muiho Mugvai)

--> 2022-01-14 5 5 德宏团结报载瓦 content_32691.html 1 Gaulam byanghing wun /enpproperty-->