国内统一刊号:CN53-0013 德宏团结报社出版电话:2111017传真:2129594广告联系电话:2123901






2022年01月14日

Aizi no gam paqzhvi myidvu dang 40kat

32. Kalvum chirung ma inu eq zoshang ge lvomdvang byvam le?

Dvu: Mau eq ginwang myuq kangmo ma Myiwe zoshang no wu gonrung ma e ge lvom- dvang byvam le.

33. Hai ri gi Muishatung mai ya nyi ga le?

Dvu: Muishatung gi byu eq sai dut e lvoqbying(maqzui) chi ngvut le, mingdan mai tantan gon lazhang e chi lahu ngvut le, pyenpyu pyennoq yin ri wo ya ge le. Muishatung mai noya nyi ga e gi, muishatung aqing myang shoq zo nyi angvut zhang yishi zo nyi lui pyenpyu yin dap bang ri ya e chi lahu ngvut le. Chi xi eq imyit mai bo ya byi、loqzo mai bo lvoqbyvuq byi gvut nyi zhang, pyenyin mai gungdu zhiten jvop ra qo wo lvoq shau byvam byi le.

34. Kasu bang muishatung ge dung zo le?

Dvu:Pyenyin adam dam don wu ri roq awo donbyvam dut e apyen dvan chi ri agon chung lum nyi bang; Asak 18zan atoq bang; Yvumsing nyi zhowo ginwang mingbyu angvut zhang yvumsing zhowo ma lvomo 6qap atoq byamnyi ra lakmat wo e gamau byu; Muzui wum-o bo bang;Aizi no ban dap gu e apyen chi dvan agon chung mu yin ban dut gu bang ri gi asak 18zan atoq adai ra.

35.Muishatung muize shuq byu ri wo tuq girum byi e gi kabve bo le?

Dvu: Muishatung shuq zhang pyenpyu yin、yapyen yin ri nayi 24-36qing wo zhan nvang le, muize yin ya nyi e kun muishatung gejvo chung zhang, muize yin bo bang ri imyit shilvai shoq adat wo numzing nvang, shilvai shoq ri adat wo ngon nvang, dum ngvutzhang muishatung shuq ri age qo zhaq shau le. Haumu, muishatung shuq e bang muzui zhisai igvun gvut qo hai ara bang eq lazhung za wo dut lui, pongshingra ma gewang bo e byu layuq wo bo dut nyi le.

36. Muishatung yu shuq ra akang dung ri kingze kabve hen ra le?

Dvu:Tumwa kau ma chi mai noya nyi ra e yvumsing yvang akang dung ra le; Apyen dvan yin dap e lakmat(Gung-an、Sifaq rung- wap muiyin zhvindon byvam lakmat、yvumsing yvang muiyin donbyvam nau e lakmat eq gadvu muiyin don byvam sakse lakmat wo dut e kingze); Gungshit lakmat、byudu gvazving buk fuyinjen angvut zhang byamnyi lakmat fuyinjen; 1cun bo e datbung 2qap;Kasu mu Aizi no nobau dap be byu angvut zhang nobyu gi, nodap e sengang kingze yu toq byi ra le.

37: Muishatung shuq ri gewang kabve bo le?

Dvu: Dvara ma ang:Mingdan mai wu- dveng dvo e noya chi. Maugom ginwang myuq kangmo ma Jikung zhungxin ma muishatung mai noya nowu wap 5wo ma cuq dvo be, mauwa myuq no ya zhang eq wapung no ya zhang lawam ma chi yu zo ra zhang 31wo ma pong cuq dvo be.

Hai ara:Sengang chi sara yvang nosu e nosam mai wudvu mu chi yu byi le, muishatung shuq zhang pyenpyu yin、yapyen yin nayi 24qing mai 36qing wo zhan le, age qo ri shau le.

Ngunze:Asuya wapdoq mai girum dvo le, chi lanyi shuq ri, no ya pau 5koi za yu le.

Gewang:Lanyi ladam za shuq le, muzui alang jvo、igvun zoshuq eq paqzhvi mvoq qo alang jvo ra.

Yuqyo:Minggom ma nowu zhang、chi yu shuq zhang sholvum gvo cuq dvo be, yvumsing muzo、igvun zoshuq qo mai sho lui chirung shidaq ge bo lvik wu lvum le, gaming nowu chishuq zhang ma ri chi ge lvik yu lvum le.

38. Myilang nyi dvoqlvum eq Aizi no gi kabve senglvum le?

Dvu: Myilang nyi dvoqlvum e miyat king jo ma toq e azhung zhung no angvut zhang dam dut lui, shoyum lvoq qut cheq hai mu zhang, Aizi no nobau gungdu kau wang ra e zhe myo le, myilang nyi dvoqlvum e no bo be bang Aizi no zhe dap lui le.

39.Anqen tau gi myilang nyi dvoqlvum ra no eq Aizi no gam gewang bo le dvi?

Dvu: Zhoang dong anqen tau chung zhang myilang nyi dvoqlvum no、Aizi no ri wo gam le, diqa gi juqra dut e byu pung ri qom chung nvang zhang gewang zhe bo le.

40. Aizi no nobau wun bang eq nobyu ri kadong zhvit migum awu myvuq gvut ra?

Dvu: Kasu mu nang gungyam ma zhongzo numnang、byinchang、 buinum wui、 yvumbyu Aizi no dap zhang, kajuq angvut zhang yvangmoq ri age panghui byvam, Aizi no gi yiqxin ganyen、byinxin ganyen eq la- zhung ja za dat dvoqlvum le. Muzui zhisai igvun zoshuq ma zang nyi dvep lvum, danggve: Mu lawa zui、paqzhvi lawa mvoq、zang lawa zo、matung chom chung hai gvut zhang Aizi no adat dvoq lvum. Nang yvang eq yishi le eq lazhung za ge zum le.

Aizi no bo byu ri lago bo zau byi ra le, ming ma age byvoshit age se nvang e ri zau byi ra le.

Igvun eq pongshingra mai Aizi no nobau dap byu eq nobyu ri lago zum、myitlving byi、wangzan e igvun zoshuq eq muzui zhowo tong byi lui, byunyi byuyap qo lago daijving jvo mu, lawan wan nobau lvomdvang byvam nvang mu, sakgvang lvoqhing yu zhang, Aizi no gam qo eq pongshingra zimra qo ma gewang zhaq gvo le. (Puqsu Mulat)

--> 2022-01-14 5 5 德宏团结报载瓦 content_32690.html 1 Aizi no gam paqzhvi myidvu dang 40kat /enpproperty-->