国内统一刊号:CN53-0013 德宏团结报社出版电话:2111017传真:2129594广告联系电话:2123901






2022年01月14日

Byuze byvat bujvin sanghi cham jvin ging ra le

Zhunggo suthum mu zuihi qo ma Yinnan bvunlai qohi bang gvat toq e wum-o

Shihong, Be amyvu, 1900zan ri Yinnan E-yen ginwang ma choqpyit e yuqzo. 1917zan ma Qingfa zhong(akui le Qingfa dvanmo zhong)wo zhvam wang mu, xizhong ma e zhongzo pung up suwun gvut lo wu e, yvang 5qap 4nyi muham lago bo ham lui, Qingfa zhong ma e tingshang uhi she zhongzo dut be. 1924zan lvomo 7qap ma Shihong Qingfa zhong mai doq ong toq lo lui, zauwui pyai e Muigo Sitanfu dvanmo zhong e myang doq mu, minggvan buitoq qam labau paqzhvi rotshoq wo mvoqse yu be. Shihong yvang Muigo ma zhong e doq nyi u, laqo gi zhong doq, laqo gi bvunlai mu kat bo gvut lving e. Haukun Zhunggo mai Jujinshan ma nyi wun bang eq zhong e doq e zhongzo bve zvangyang pung chom cuq mu, kadu ka bvunlai mu kat bo gvut lving, yvumsing mingdan bvunlai gisat lai nyi bang eq ri loqcoq lvum, wum-o daicung lvum gvut gvo ngvut le. Haukun Muigo Gungchandang wapdoq aji wa Laiwen ga su, Shihong bve gvut gvo e bvunlai mu bose bo myang mai, yvang ri azhi gvilvang Shihong zhizving e zuppong le bolom, Shihong ri le zhi mu Muigo Gungchandang lam-yong buinyi shui lom, Muigo zhimu byu bve eq loqcoq se lvum nvang le gvut be. 1927zan lvomo 3qap ma Shihong yvang Muigo Gungchan Dangpung bo wang mu, Muigo Gungchandang Zhunggo rung ma e zhe gvo aji gvut be. Xigi Muizhu mau ma cuq e sanghi pung Zhunggo Gungchan Dangpung ngvut be. 1928zan ma, Shihong Shosi showei ga e paqzhvi gvung mying wo be. Hauzan yvang Bemei Gungchan Dangpung cuq ringzhat qo wum-o bo gvat toq be. Haukun ma mingdan kangmo ma e Gungchandang bve ri minggvan Gungchan Dangpung mai zhvat qom shui zhe dvo gvo e, haumu Muigo ma nyi e Zhunggung Dangyen bve ri Muigo ozvang Gungchan Dangpung e ban bo wang bigvo. 1929zan lvomo 12qap ma Shihong Mosike ma lazan lo mvoq shigut ra aming myang yu mu lo be. Hautang a myang ma gi, minggvan Gungchandang zo jvo mu gon wap ma myingpuq mu e wun zui be. 1930zan jvoshu yoq ma, Shihong yvumsing mingdan dvau lo mu, Shanghai Zhunggung gunzhvung diqa laigva lazhang wap, Zhunggung gunzhvung myingpuq wap, Xanggang wuilvai mu zuisai muzum pung, Shanghai muzum pung bve awo wo ma dum kat zui wu wun be. 1931zan ma gi, Shihong ri Hebe ming qo dum pyai nvang gvat gvo mu, Zhunggung hebe ming wapdoq suwun、 kojvo rung upzau eq ming wapdoq aji wa dum gvut nvang bigvo. Asu 1933zan joqmyo ma, byu- pyeq bve eq daipok toq gvo mizho, Shihong eq yvang byinchang 13yuq Be-pyin sumli paqzhvi zhong ma zuppong lo bolom gvo kun, byugoi bve eq lvom zhvup zui gvo mu Nanjin qo zhvup lo gvo mai, Gungchandang gvut e mira pyithun lui tong ma ka myvo lo shin jvop gvilvang, Shihong lazvui ri anyvom byi mu Yufatai ma gvang jo byvam be, haukun yvang zanwut 33zan za shi. Shihong gvangjo myoqbyuq byvam e qanglu Muigo shit zhe gvo kun, yvang byinchang wui myit yon ngaubyi ra yui, ra chom yon bvai gvo e. Shihong yvang Muigo ma bvunlai muzui qo wum-o bo gvat toq dik wu e mizho, Muigo Gungchandang bve zanwui le lvomo 1qap 1nyi ma “Shihong e mizving buinyi”ga misat dvo mu, Zhunggo Be amyvu kau mai nyi gvo lo e minggvan suthum myitwun jezo yvang ri advo myvi gvo, Zhunggo Qingfa dvanmo zhong ma ri Shihong e mizving muizing cuq dvo agvo.

Fan shirung, 1900zan ri Kunmyin ma choqpyit e yuqzo. Yvang 1916zan Kunmyin ginwang sira zhong wo bo zhvam wang mu, 1922zan nye yam ma, Bejin sira gvolik zhong dum wo zhvam wang be. Haumai 1924zan ma Zhunggo Gungchan Dangpung wang mu, hauzan yvang Go- myindang Bejin ngvapcik 7zhiwo Dang wapdoq aji gvut dvo gu e, Bejin sira dvanmyvang zhong zhongzo yvumsing gonkang pung midung suwun ri gvut be. 1926zan lvomo 3qap 18nyi ma Fan Shirung yvang zhongzo bve shui chung mu, Zhunggung munzhvung Dang wapdoq mai Bejin Ten-an men ma shuizup gvo e kokam zik up ming gvut nau bang eq Zhunggo sing ako zhiten bang ri dvupuq byin pye e mingbyu zuppong e bolom, suya dangmyi e bo myi, solong e bo long lving gvo ri, DateShiziHudung Beyang jemik nyi e suya kumdong so zhe gvo kun, Fan shirung ri je pyeq bve eq lvom bik sat zang bigvo, haukun yvang eq laha bo shi e Yinnan byinchang Yau Zungxen ri bo le.

Yau Zungxen, 1900zan ri Sichon Huili ginwang ma choqpyit e, 1912zan ma yvangnu yvangwa eq Yinnan Yenme ma lo shui tot nyi bigvo. 1917zan ma yvang mingzvang ngvapcik 1 joro zvang zhong wo zhvam wang mai, 1922zan jvoshu yoq ri, Bejin laili zhimu zhong minggvan buiwang qam alvo soi pung ma dum wo zhvam wang be. 1924zan zan-u ma, Yau Zungxen Zhunggo Pongshingra sakram pung wang lui, hautang a myang ma Zhunggung Dangyen bo gvut be. Haumai Bejin laili zhimu zhong ma e zhongzo yvumsing gonkang pung zhvungzui suwun gvut lui, Zhunggung Bejin laili zhimu zhong Dangpung aji mying wun be. 1926zan lvomo 3qap 18nyi ma Yau Zungxen yvang e zhongzo bve shui mu, mingdan ungzo e Beyang suya bang ri dangmyi chom yan gvo kun, yvang eq Fan shirung ri gvut Gungchan Dangyen 7yuq ma mingbyu 40yuq hau yvang mi shamshi e kamzo shit gvo e.

Zhe noq mai Zhunggo Gungchan Dangpung bo wang e Yinnan byu dum bo ashi gi, Wang Desan、Lixin、Lyu Pyinkai、Zhang Jinchen、Yang Tenqing、Zhang Yunghe bve, yvangmoq zhe noq mai Bejin、Shanghai、Gongzhu bve zhiwo kangmo ma e bvunlai mu bo kat zui wun gvo mu, Zhunggo Gungchan Dangpung cuqhi qo ma, midung wum-o zhaq wo gvat toq dvo bigvo. (7)

Puqsu Pauqi Mudvom

--> 2022-01-14 Zhunggo suthum mu zuihi qo ma Yinnan bvunlai qohi bang gvat toq e wum-o 5 5 德宏团结报载瓦 content_32684.html 1 Byuze byvat bujvin sanghi cham jvin ging ra le /enpproperty-->