国内统一刊号:CN53-0013 德宏团结报社出版电话:2111017传真:2129594广告联系电话:2123901






2021年02月03日

Hpang jahtum na shan

(Shata 1 pro 27 ya na do)

Ma Dut hte Njo La go shani shana tsa seng sa, shan ju mung kam ai hku sha rai pyo hkom nga ma ai. Ndum nmi ko Ma Dut hpe Njo La e gang bang ai ka-ni nanghpam nhkun ko shang mat nu ai. Gumhpro lu manu ai re majo, ka-ni gadon ai ten mung n nga, shanhkau a prat go mungkan ntsa hkohkam tai ai daram hku pyo dum to nga ai.

Hpang shaning mare buga de bai wa ai shaloi, Tu Ja mung shan ko hkan nang mat wa sai. Seng Li go nta dinghku ko madu jan machyi song to nga ai majo, n lu hkan nang mat wa nga ai.

“Gumhpro lu mayu jang go ndai shong chye lu ra ai, ndai lu jang she lauban manang ni hte aga rum ai, lago asat mung tsang ai, dai hta n-ga bonu mung grau let grau zen wa chye ai, mo, nang chyam yu u.” Ma Dut yan ko hkan nang ai Tu Ja hpe Njo La go shing nga nna, shi a sumbu ko na ka-ni palin mi sho ya dat nu ai.

“Gumhpro she lu wa ai bo rai yang mo yu ga le, hpa ngu ai rai wa re ni? Ngai go nan na daram n zen, hpaji mung nan daram n kung ai, loi lo hkra lu ra na re.” Tu Ja go hpa mung n chye ai re nga yang gumhpro lu na re nga jang galang ta hta la nna Njo La yan Ma Dut galo ai ko hkan nna sharin bang wa nu ai.

“Ok! n rai wa re nga ai lo, pyen wa re nga ai, lawan no magra la marit lo!” Tu Ja nambat langai lang lu ai re nga yang bo ginsin wa ai zon nga, madon mayu wa ai zon nga rai, masin htu gahprap shatsang wa nna gajong nga u ai.

“Ngai shong de nambat langai lang lu ai shaloi mung nang hte maren nga ai re, man jang n ra na ra ai.” Ko da ko ka-ni jom lu nga ai Ma Dut go mani kre nga ai.

Nta buga de na Seng Li go madu jan e machyi si kau da rai, makoi mayang poi galo ai shaloi, laning ting sha na n-gu sha ma kau, wuli ngu rem ai nga ganu du hkra sat sha kau rai, dinghku seng hte hkang rai mat nu ai, madu jan ma n shangai shaprat da ya ai majo, shi hkrai shani shana mare na tsa ya ni hte tsa dingsa nna nga mat nu ai.

“Hkau Tu Ja e, nang she anhkau ni ko na grau gaji ai rai sai, nang hto arai mun dang a no wa la su, ya hte na rai ndai go loi atu lom sam jo ai, gade lu bang tim nau nbran nbran nga ai lo, let e dai shat shadu ai Ja Ra hpe shat hkyem wa rit ngu tsun da u.” Njo La chyahpung dun ko myi myepmyep ton nna Tu Ja hpe shangun nga ai.

“Hkau La e, anhkau ni a ngam ai ja gumhpro n lo sai, bungli she lawan shang ra sai.” Tu Ja go gumhpro lam jum ai re nga yang, loi myit pu let tsun dan nu ai.

“Nra ai, daihpot Ma Dut hto hpun lok madu wa hpe sa hkrum mat wa sai, bai lu wa na ra ai, dai lam nang hkum tsang u. Mana nang gachyi sha marop nna bai hkring mat, Ma Dut anhkau chyu she ninghtoi le jahta let jom shakri ai.” Njo La hpa mi nra ai hku sha nga nga ai.

“Hkau La e, daini go hpa shani rai kun lo, hpun lok du wa hpe sa hkrum yang, daining go hpun sho ai lam no jahkring na re nga ai, ya anhkau ni ganing di ai bo wa rai kun?” Tu Ja rai mat wa ai hpang, Ma Dut shang wa nna shiga wa tsun dan nu ai.

“Hpa hkum tsang, ya ngai sa hkrum yu jang mai na re, shawoi shaning mung dai hku hkrai nga ai rai ma ai re, hkum myit pu sa, ndai wan n-gun she no bai wa dat la, mana na ngam gaji mi no rong ai, Tu Ja hpe bai mari mat wa shangun sai.” Njo La go ka-ni sau ai hpe sha madat rai, bungli hpe hpa aye n la mat nu ai. (Bai matut hti ga)

--> 2021-02-03 4 4 德宏团结报景颇 content_19039.html 1 Hpang jahtum na shan /enpproperty-->