Ngai mare salang a gam maka maja maja nga let nga pra ra

Hto...
Shagong bumrin ntsa
Utu chyangngau Umyin ngoi gara
Jinghpo W.P bum ga
Nye a dailup daihpang ginra
Daido buga maden ai ngu yang
Mare salang galo ra ai ko ang
Mare salang nkam galo ngu ningdang
Gara hku nna raitim ngai ko sha ang
Buga hta ka-ni ya lo ai hpe mu lu
Ningdang kau na ngu ngai myit yu
Raitim mare ni n hkro ma ai
Ngai nan mare salang lit la ra sai
Nang shakut dangam rai nga yang
Dutdang ai lam ni hpa hkum tsang
Anhte shawa ni garum la na
Nang salang magam hta lau shakut sa
Ndai zon ngai salang magam hta shakut sa
Mare ko ka-ni ya grau lo jat wa
Lagut ndu grau prang jong nga
Masu mago mung grau song
Ka-ni ya ni gashun lu gashun sha mong
Uwa yamnga nmai dat da
Magam bungli nmai ongdang nga
Asuya tara mung galoi n shang
Ndai zon re hpe n lu yu shanang
Ngai tara shaja jahkrat sa wa
Ka-ni ya ni hpe zuphpong woi hpong la
Ka-ni don rung de
Sa bang na ngu tsun yang
Yong go hprong makoi lagyim mat shajang
Ka-ni ya ni jahkrum la nna
Ngai hpe lagu sat kau na nga
Ngai hkai da ai hkainu azat kau ya
Layang hpun maling mung nat kau da
Hpunggo hpungwai hkan mung
Ngai hpe gyem
Tsa chyaru ko
Yu tsi bang jo na mung ninghtan
Ka-ni ya ni Udi a matu tam rai
Ngai hpe jahkrit shama nga ma ai
Ngai hpe shawa gumhpro hte sha kau ai nga
Shara shagu hte tsun shapo gara
Ngai shawa zuphpong mung nmai woi hpong
Shawa magam bungli nmai woi magum
Maja hkrai maja nna nga
Hkrit hkrai hkrit let pra
Ya anhte gahtong ahpang hkrat
Masha lahkam hpe nmai dep
Raitim Ubadi shingra hte rau
Ningtuk ka-ni hpe hkan jep hkrau
Ningtuk ka-ni nnga ai buga tai lu hkra
Ngai mare salang wa woi shakut sa wa na