Jau Kyin ginjo sharin shapan rung de

Sakhkung sharin shapan dap ni a nnangnon hkye hkrang lam wa tang shana u ai

Madu dap shiga Ndai lapran, mungdo pati rapdo mu madu Jau Kyin ginjo sharin shapan dap de Yinkyang nnangnon tsin-yam masa hte sharin shapan rung dap ni nnangnon tsin-yam hkye hkrang ai lam ni wa tang shana dan u ai.
Shata 8 nhtoi 21 ya shani, Yinkyang ginwang hta atsang 5.9 du ai nnangnon non nna, mungdo ting na ginwang 3 myu 2 ko ganon hkra nga ai. Nnangnon hta jong nta ni manu mana hten grop mat rai nna ram ram sum hkra mat nga ai. Tsin-yam byin pru ai hte, pati ginjo, mungdan magam rapdo, mungdo gaba pati rapdo, mungdo gaba asuya hte Sakhkung mungdo pati rapdo, asuya ni manu mana maju jung ai hta n-ga, mungdo gaba pati rapdo, mungdo gaba asuya hte sharin shapan dap ni mung woion ningbo lo malo hprai dat nna, tsin-yam hkrum shara de lawan ladan rai sa du gawan nga ma ai. Mungdo gaba sharin shapan dap ni mung laksan hpung hprai dat nna tsin-yam hkrum ai shara na jong hkan sa du nhtom, tsin-yam sa hkye lom ma ai. Jau Kyin re anhte mungdo na woion ningbo ni mung tsin-yam grau na-du ai shara hkan dingyang sa hkye shakut lom ma ai. Mungdo  shara shagu na ni jom shakut ai nga yang, shata 9 pro 1 ya shani mungdo ting  na jong gaji lapran tsang jong yong go jong apyo sha lu hpo sai hta n-ga, tsin-yam a majo jong nlu lung ai jongma mung langai pyi nlom nga ai.
Tsin-yam shara na jong ni aten hte hkrak  jong lu hpo na matu, mungdo gaba pati rapdo dakkasu jong gaba mu madu Du Yi Yin, mungdo gaba sharin shapan dap up ningtau Ho Fu Shin woi shingnan ai gata hta, Jau Kyin go mungdo sharin shapan dap ningbo Wang Gin Shun hpe woi nna mungdan sharin shapan dap up ningtau Chin Shau Ya hpe tsin-yam sat lawat ni wa tang shana dan u ai. Chin Shau Ya go tang shana ai lam madat mara la nna,  anhte mungdo na tsin-yam hkrum ai lam ni si mani san la ai  hta  n-ga, jong ma sara ni hpe mung san gawan dat u ai. Anhte mungdo na pati rapdo, asuya , sharin shapan magam galo ai ni yong  hpe  tsin-yam hkye mawai shakut shaja ai majo grai chyeju dum sai nga nna mung tsun u ai. Shi tsun ai, Sakhkung na tsin-yam  hkrum ai lam hpe anhte atsom myit yu na ga ai, sharin shapan dap ni mung mungdan magam rapdo ni hpang de bai shana nna, jong gogap ai hta  grau lo ai hku madi shado hkrat wa na ga ai nga u ai.
Wang Gin Shun go mungdan ja sutgan gon hkang rung, laksan ja gumhpro hprai lang shara na seng ang woion ningbo ni hpe anhte mungdo na tsin-yam hkrum ai jong ni bai gogap na masing ladat ni mung tang shon dan u ai.