BEJIN 2008ZAN  GUNGDU  IPYO  TEN  E GUNGBYVAN ZUPPONG   PONG DVOM BE

xinhua wang 9qap 17nyi dat lusik  Lvomo 9qap 17nyi myin ri, Bejin 2008zan gungdu ipyo ten bang e gungbyvan pongdvom zuppong mingdan gungbyvan zhang ma zhaq kikshoq pong be. Minggvan mingdan zhiwo kangmo mai zhe le lo e gungdu ipyo ten e gungbbyvan byu byuqing 、 sara(jaulen yen)、 buinum gumang nvikdvang auzo numnang wui, zhiwo ma le zhe wu bang 9qing yuq myit laha, gabu gara Bejin gungdu ipyo ten zuppong ong bidang wo lui chom kilum be.
Pongdvom zuppong ma Hu Jintau、Jang Zemyin、Wu Banggo、Wun Jabau、Ja Qinlin、Li Changchun、Xi Jinpyin、Li Keqang、Ho Goqang、Zhu Yungkang mu e Dang eq mingdan zaugun suwun wui bilom be.
“Ilvum auyin lazhung za zhvoi dik ra.”ga e xi gi Zhunggo mai minggvan ma dai e shinggvang dangkun. Bejin gungdu ipyo ten bang e gungbyvan zuppong lago shuipung、 hai ara e ze kum、 byu qo nyang lui, gungbyvan byu、 sara eq minggvan pong shingra mai zhaq dai qeon agvo.Qinglvum zhang ma, 147mingdan eq zhiwo mai le lo e gungbyvan byu 4000yuq myit wum gvat gisat qinglvum mu, minggvan ma wo mizving dvo e 279kat,gungdu ipyo ten zuppong ma wo mizving dvo e 339kat. Zhunggo gungbyvan gungtai pung wo e hinglong 89lvum 、arong long 211lvum,hinglong eq arong long zhe wo yu mu, lai lo be gu toq ma zhe  jai e lada ngvut be.
Nayi 7qing gvo ma, gungtai pung kangmo qo lai zhang 4wo mai laha yan wang lo bigvo, zhiwo ma wu dvo bang gabu gara loq byvuq bat le gi shit ga dvo be.
Gungbyvan zhang  kau   datwup ma, qinglvum lai lo e shingran azhung zhung gvattoq shit nyi be. Yvumkung atoq ma zhvun kangmo mai myizik bik bvuq dvoq le myva gvut ri Bejin ipyo ten  e gungbyvan zuppong pongdvom wang lo be.
Je mikon mut pung Zhunghua gumsan mingdan mikon mut myving lui, zhvoisan dik e 5jvo dongkon shinggvang bo dik e mingdan mikon te kau ma dvoq gvat be.
１４７yuq dongkon waq bang wo kang mo ma e dongkon waq yan wang bum lo bigvo.
Zat mikon ban byvaq tang ma, Bejin gungbyvan muwun wap zau  Liuqi gi gungdvon dang dai ra.Yvang Bejin gungbyvan muwun wap gungtai gvut lui, xi da le gungbyvan zuppong lo lom e gung   byvan byu ri gabu gara kilum ra, minggvan gungbyvan muwun wap、mingdan kangmo eq zhiwo kangmo ma e gungbyvan muwun wap、minggvan zhiwo kangmo ma gungdu ipyo ten bang ri amu bi dve zui bang,gungbyvan zuppong ma wum o bigvat e bang banshoq ri ajvu bun dang dai ra. Yvang dai ri,Bejin gungdu ipyo ten zuppong myidum shibyvam aqing zhe be ngvut gvolvang, nganvung imyit ungkau mai chom gvungdvon shang:Zhvitdap imyit mai dvap e myihu dum mai,duqbo zhvoi dik e zhvitdap laijvang imyit wo coq dvui lvum be.
Minggvan gungbyvan muwun wap zau Ke Luiwen pongdvom zuppong ma gvungdvon dang dai be.
Yingo mingdan dongkon dvoq e mai, minggvan gungdu ipyo ten e gungbyvan zuppong mikon te akau ma zuppong dongkon qo yu be.
Minggvan gungdu ipyo ten gungbyvan muwun wap dongkon coq byi lvum be.Bejin myuq up zau Go Jinlung gungbyvan wap dongkon qo yu su e loq mai coq yu lui, zhiwo ma hi he byva shit e mai, Ke Luiwen loq ma gvat byi be.Ke Luiwen gi 2012zan ri gungdu ipyo ten bang gungbyvan zuppong dum pong ra e zhiwo Yingo Lundun myuq up zau Baulisi.Yohansun ri byi be.
Hau u,zuppong zhang ma noq lo ri, ipyo ten muwun wap myihu goidvu yvang duqbo dvo ra.Gungbyvan zhang gunggung ma e mvan yo ma, nozhit nvutzhvit myiwe zo wui loq byvaq byvaq mu myihu eq dang dai    agvo......    (Puq lazhang su Mulat)