NGANVUNG MAU MYINOQ DON AIZI NOGAM MIZHAN DATWUP ZUPPONG ASIK DUM PONG BE

wap ma e lusik Xiqap 12nyi myintang, nganvung mau myinoq don aizi nogam mingbyu mizhan datwup zuppong asik dum pong be, maugom ma e myinoq don aizi nogam loq mu sanghi dum shui gvut e lo ra qo shuipyai shui gvut e lo agvo.
Mung Byigong、Gung Jinzhin、Li Song lin、Liu Wusan、Goq Zhideq、Kung Lagam、Mawun mu e nvikbo wui zuppong wapdoq ma le zhe zung agvo.
Mau zhvum dvirva wapdoq shuji Goq Zhideq zuppong zhvung zui ra. Mau suya wapdoq mudve Liu Wusan sin dang wapdoq、suya wapdoq mai 2005zan eq 2007zan myinoq don aizi nogam mingbyu mizhan amu gvut ge e rungwap eq yvumsing ri zang qeon e bang dai shit jvo ra.
Mau suya wapdoq nvikbo Mung Byigong zang qeon e bang ri gvungdon qeon ra, myinoq don aizo nogam loqmu zuinyi e bang ri nvikngon dang byi ra. Yvang ga ri, maugom ma e myinoq don aizi nogam loqmu hi 3zan gu gvut lo e ongshi zhaq bo zhaq myang be, ngvut ri, nganvung mau gi myinoq toq wang eq zhvang mu, myinoq toq wang、aizi nozhoq e aqing hing be, muwo zhaq lai le. Maugom wapkang ma e bang myinoq don aizi nogam mizhan zan wui、mu wo lai e gi ra se ra ra le, nganvung akui le e zong eq bobum e mangkang ri lago wu, atoq zvang wapdoq mai pyai byi e“Myinoq adon ri nga nvik ashi, aizo no atum ri ngo yvup amui”ga e dang ri myit ma ra gvat ra wun yu lui, akui nga- nvung mau ma e myinoq don aizi nogam 3zan dum gvut e lo e loqmu lago gvut ge ra dut le ga.
Mung Byigong sai dai le, zvang wap kangmo ma e bang lago sai shuion lui, myinoq don aizi nogam mingbyu mizhan loqmu xi lago chom hap zui waq lvum ra dut le, loq mu pyai ge lvum、loqmu hapzui ge、zui e lo e qo ang qo nyang, pongshingra、shiwa banshoq bang wumhum uhum ri myinoq don aizi nogam mingbyu mizhan zan ong ra qo gvut shang; akui dut toq bum e mu ri wu ri, myinoq saitoq、ung、shuq xi sumwo zuiging ri myinoq wang pyit, myinoq wang qo pyit ri myinoq shuq byu lvoqpyuq ra dong gvut; mingdan mai“Apau 4lvum ayu lalvum gi lago gon”eq Sin ma e “Dvirva lakat 6lvum mu”dvirva xi lago sai chung sai chang ri, myinoq aizi no asai myinlam lo ra qo lago zuige ra dut le ga.
Mung Byigong ginwang myuq suya wapkang bang eq 《2008zan myinoq gam loqmu hapwaq lvum laigva》qom chom gva hapwaq lvum be.
Ximai, Mau suya mudve nvikbo Mawen eq Kung Lagam ri myinoq don aizi nogam mingbyu mizhan atoq a-o yomu mau zhe lago gingging chom zan jvop ra qo sai dai agvo.
Zuppong lom byu 500yuq myvit bo ra, ximai, ginwang myuq kangmo bve ma ri datwup zuppong xi pong wu zhang gvut bum agvo, xangzhin kangmo ma e cun eq cun ma myinoq gam loqmu gvut e gungzo dui bve mu e bang datwup zuppong xi biwu bijo agvo.
                  (Puqgva su Mumvau)