kung lagam maugom ma e dingere nogam zuppong ma

RUNGWAP KANGMO WUMHUM UHUM RI DINGERE ALI NOGAM LOQMU LAGO ZUIGE SHANG GA DAI RA

wap ma e lusik Xiqap 12nyi myintang ri, nganvung mau dingere ali nogam zuppong pong be. Mau suya wapdoq nvikbo Kung Lagam zuppong ma rungwap kangmo myithum uhum ri dingere ali nogam loqmu lago zuige shang ga dai ra.
Mau mingbyu gunglvik gungtai wapdoq mudve nvikbo Yanghung、Sin bau nogam zhep gon wu wapdoq nvikbo Zhang Zaixin、ginwang myuq kangmo ma e mu eq senglvum e rungwap bang bve mu e bvang zuppong bilom agvo.
Zuppong ma, nganvung mau ma dingere ali no doq e qo eq nogam e qo daijvo agvo. Hiqap 24nyi mai xiqap 11nyi zhe zhang, maugom ma ali no xi doq e nobyu 22yuq, Wandin chirung ma lung dvo e 2yuq, Luxi Mvanhai zhin chirung zo ma nolung dvo e 12yuq、Mungga zhin chirung zo ma yalung nyi e 3yuq, Mingmau chirung ma no nyi e 5yuq ngvut ra. Ali no xi toq e mai, zvangkang mo ma e dang suya wapdoq eq sanseng wangzan rungwap bve mai mu midung mo gvut ri, Wandin、Luxi、Mingmau 3zvang amu gvut  lo e qom jvo ri, nogam byu shuipung ri xangzhin kangmo lo ri nogam amu lo kat qom zui be. Akui, ali nodoq e bang yvum-sing zhiwo ma hanhan qom ya nyi be, akui, ya ge ri chirung mai toq lo e 12yuq be, ya nyi e nobyu 8yuq bo ashi, ali no gawo qo amyin lo shit, ngvut ri nobyu gi sai myo nyi ashi.
Kung Lagam nvikbo maugom ma e dingere ali nogam loq mu xigu gvut zhe gveq ga dai ra.1. Ali no xi ri mu midung gvut shuion zui gveq. Zvang wapkang ma suya wapdoq eq loqmu zui e wapdoq kangmo, dingere ali nogam mu zuige ra e, no hanhan jinjin shuizui shuigvut ra dut e ra se ra dut le, loqmu xilvum gi akui u eq akui mai latung gu mu midung gvut zui ra dut le. 2. Rungwap kangmo mupyai hap waq lvum ri loqmu lago zui zhe lvum ra a le. Ginwang myuq suya wap kangmo mai, mu gon nvikbo ri pung nvikbo cuq ri, senglvum e rungwap nvikbo wui dingere nogam loqmu shuion pung ma gvat mu, amu zui wap cuq dvo ri, yvumsing wang ma e dingere nogam loqmu han zui yu gvut gveq. 3. Ali no zhepgon ri lago jvo, nodoq wang pyit le gvut lui lago gonge zhe ra ra le. 4. Mu paqzhi lago sai mvoq ri mu lago dat zui ra qo gvut ra dut le. Zhe gi chi sera gvut bang ali no paqzhi lago hi mvoq se yu ri, no lago ya lago gam ge gvut zhe ra a le. 5. Jvang lago zhepgon wu ri jvang lago sat ra dut le. 6. Lago qom jvo ra ra le, ali no kasu doq、kasu gam ra bve banban lago dai-jvo zhe ra dut le. 7. Myenming bang eq loq lago coqge lvum ri ali nogam mu xi lago chom zui ge a dut le. 8. Ali no xi ma chung ra e ze lago qom hen ge ri, hai byam dut byam ra lo ri han wo gvut ge ra qo hen ge dvo ra ra le.9. Loqmu kasu zui lo e chang zhep gon le gvut ri loqmu xi lago wo zui ge ra qo gvut ra dut le. Mau suya wapdoq mai, zvangwap kang ma e loqmu chang zhepgon shoq gvut ra dut le ga zhaq dai ra.        (Puqgva su Mumvau)