sikmo gam e yvangzo

Anvam byvat ri, myidam toq ma byu anyi, myi azhoq shi byvat ma, ashau shau e sikmo gam za zhoq mu, hau mai zhe gvo zhe kik e sikmo gam lagam zhoq mu, lalat ma lvang damko mo lako dap e ga.
Lanyi ma ri, sikmo gam hau sheq“Zhvi eq zhva eq”ngvu mying na shi mu, shi qo nun mvoqqo nun gvut ri, abvun eq lau leng be sunngvu mying na nyi be ga. Haumai zvomra zo ma gi“Rung”ngvu mying eq damko hau mai yuqge zo layuq byvik zhvap toq lo mu, byuzo hau myigung ma le jo nyi mai, gvo lo soq ma, kimyvo nyi angvut ma, gvobang mo dvoq dut be ga. Yvang gi sikmo gam e dam ko mai toq lo e byu dut mu, yvang e mying gi Pung Ginpung ri ngvu mu zai Xidan Ga pung ri dum ngvu, lazhvum gi shusin ngvu e dong ga.
Pung Ginpung layuq bau bumyam ma nyi mu, sikyo tuq gong ri dungguq arang za dvuizo ri igun gvut nyi.
Lanyi ma ri, Pung Ginpung mup yo e zhap nyi zhang kinvam ri atoq wu e mu toq be, yvang hi nyi e qom zhap mvup dvo e mup yo ma sik, lamyin za lai eq zanko ri adong lang lazhung za dum yuq lang bum, azan abyin wu eq lazhung za dut lang ga.Haumai Pung Ginpung mau le gi, hai mizho mu xi su dut e dvi ngvu mu, hinyi le su zai dum sai tuq byin jvop be ga, asu wa sai byin be ngvut gvolvang lamyin za dum lai eq tangnyi e dum wu zhang zan ko  adong lang zapzap dum yuq lang bum be ga. Haumai zai kimyvo dam e dum tuq mvup ngvut gvo lvang ye lazhung za lachung dut nyi mu, Pung Ginpung nvikzhum yo lo mai, myigung ma ainan zung jo mu, myoq gi dvun dvun ne shoq, yvumsing gung yvumsing dang nan nyo lo be ga:“Haizhung eq wa le chung bizaq nyi le dvi?”ngvu mai kimyin gi mup yo ma yvang wu yvup ra ngvu mu, haiwa toq lo le lvu ngvu. Miyu ma su ashau e sikmo yo dum zhap mvup dvo be ga.
Buizo bum xe lut shut jowang lo tang ma, Pung Ginpung laigong mo waq hen dvo, gung ma shamlvam waq hen dvo gvut e mai yvang zhap ge dvo be mup yo jom ma e gop dvo be ga, mauchut rumrum ga lo eq, lvomo dum chang zuitoq lo le nung ma, Pung Ginpung sikmo gam wang ma nge zung dvo migang yojom lvingquq wu nyi zhang. Lazup ma,yo um pyang mai dupdup noq e mvutmau bum su gvat dang jo le mai yvang nyiqui ri byin mvup dvo e mupyo kau ma, myoqgvuq lalap ma, upyu baba mangzo le byen mu, lo hing nyang mo lvik lvak gvut za le he gvat e tang zo ma, yolvingquq mutlving gvat eq, yvang nyi qui ri byin mvup bum e sikzo mvanzo, lvunglvang dum ban ra yap bum bigvo ga.
Pung Ginpung kimyvo qik mu lawo byin ge mup yo ri xisu le gvut byi eq ngvu don dang lo mai: Ngo myvo shigut shazhaq mu wo byin e yo ri, xisu upyu mang eq za le chung kilaq nyi eq ngvu mu, Pung Ginpung don dang lo eq laigong mo upyu mang      zhvang shut hu dvang gvat mu numtang mai nungkung shut bik dvang gvat ra hen migang aiwut dvang gvat be ga.
“Woi, Nang gi byu mishi nat lvu o?”Ngo he mup yo lazhap ri nving, nang he wa le chung kilaq nyi e gi, hai lazhvum lau dai wu aq, adai zhang ngo akui yvang lai eq biksat byvam ra ngvu zhang”Upyu mangzo mang wo jo eq, ajuq ahoq e numtang lving lo mu wuizui zo eq Pung Ginpung ri wu dvo ma dang dvu dai le gi:“Zo e, kihan, ngo dai e hijo aq, Ngo gi maunat ngvut le, mying gi Mopung ga le. Ngo gi nang ri muzui gat agat e le zhvam su, tang nung ma gi ngo sheq nang buinum mo ngvut lang ra.”ngvu.
Pung Ginpung dang kun hau wo jo mai dang advu, myoq gi zhen zhen upyu mangzo hau ri sai wu nyi ashi.
Girai wa hau Pung Ginpung imyit wui nyi e wu se nyi shi mizho, zai zhaq ngon za ngvu dum sai dai le gi: “Zo e, ximyvo gvo e maumyi ma, nang bau za lanyi le, nang ngatang nanchang aq, tang nung ma, nang zhe ngon lang bira.”
Girai wa eq sai mvoq jving yu tang ma, Pung Ginpung nvikzhvum kimyvo yo dvo gu su ri lazup ma wo mvoq yu be. Laidan nvang qo byvam, shamlvam myi ma qo byvam gvut e mai, “Awa mo mangzo e nang kabum kazhvap ma nyi le lvu o ngvu myi be ga?”
Hauzhang, Girai wa bum xe bum qo dvunmu lui dai le gi:“Nang wu aq zhe    myvang bum zhvunggoq toq ma nyi le mai, sa ngatang chang aq ngvu be ga.”
Pung Ginpung mangzo dvunshit e qo wu gvat mu, chang ra imyit bo be ga.
Yvang nvik qogoi qonyang zhizhi zhvunzhvun, wuiyoq wuilang dveng so lai gvo tang kimyvo amyang ma, mangzo nyi e zhiwo ma so zhe bigvo ga.
Girai wa Mopung e zang gai inu mying gi Sha pung ga. Yvang nvik myiwe zo layuq zhaqzhvoi zhaq yung za kudvo agvo, mying gi Momui gin ga. Mangzo nvik e lazhvum gi Pung Ginpung eq Mo Muigin ri zumzo nau nvang lazhvum bo agvo.
Lanyi ma ri, Ginrai wa Mo Pung gi yvang za-au gvut ra su Pung Ginpung ri sai zhvam wu nau mu, sikgam agang dum gvo dumzhvut e sikne gam wang ma shui e mu, dai le gi:“Zo e, nang sikgam mo xi ma sik pyo zhe doq wu aq.”
Pung Ginpunhg sikgam hau ri wu gvat zhang myigung mai sikpyo lvang awo wu rot le za angvut, summyi bvo e sikgam mo, sikgvuq za zhvut le lvang awing yui shoq e, jvaqmyaq ko ri adong, kisu gvut wo bvo doq ra dvi?    (Aban shi)       
                       (Gon gvasu Mashong)