Husong gahtong ni hpaji ningli shalik shapan  nta  gogap ton lu masai

Shata 8 nhtoi 30 ya shani, Yinkyang ginwang Htaihpyin gat mare Share mare salang rapdo Husong gahtong na shawa masha ji nban yong bu hpun palong mon sumli la nna, mani sumsai myiman hte htongbau nsen, mahkon mangui, magyep tsa hku hte tinang a hpaji ningli shalik shapan nta ngut kre dingshon shang hkalum poi jom hpo lai wa masai.
Mungdo asuya muhtam lam jep yu hkom masha Li Shang Zhen dingshon poi ko sa du hkalum lom ai hte rau, Husong gahtong Jinghpo amyu shawa masha ni hpe hkaimu bungli sharot zinghka hkrat wa ai hte , madu a tsom htap dum nta go sharot la, ningnan ai hkaimu gahtong go maden ai asat lago lau lau htot hkrat wa rai na myit n-gun sharot sa wa na hku nga mungga sa hko tsun u ai.
   Dingshon poi ko sa du hkalum lom ai mungdo asuya muhtam gok, mungdo naimam gon hkang dap, ginwang kunghpan hpaji ginsup gon dap re seng ang rungdap hkan na ningbo ni Husong gahtong ni hpe hpaji ningli shalik shapan  mu galo ai ko lang na rung rai re ni sa kumhpa  ma ai.
    Husong gahtong go htinggo 41, masha jahpan marai 182 du ai Jinghpo gahtong re, gahtong ndai ni go mung jarit makau hku nga shanu nga ai rai nna, lai wa sai ten hta, gahtong masha ni maigan mung de na shang ai ningtuk rai ka-ni hpro e shaza hkra ai na-du dik ai majo, ka-ni hpro lu, ka-ni hpro dut, lagu lagut re nhkru n-gaja ai lam lo lo nga gajang nna, gahtong hta masha ni gabu gara mani nsen hte U goi ai nsen ni pyi nna mat, shinggan de na ni e “Shau Kyinsan gyo ” ngu shamying kau ai mung hkrum lai wa yu sai. Ningtuk  ka-ni hpro chyam bra wa ai masa hta hkan nna, Husong gahtong ni go 2004 ning shata 3 hta gahtong nhton ningtuk pat htung tara jom gadi shapro da nhtom, dai shaning shata 8 hta mare makop hpung bai zuphpo la re ko nna go, gahtong masha ni tinang ko nna ningtuk pat, ningtuk ye  seng re mu hpe numdon nnga hkra galo bang wa masai. Dai hpang mungdo ningtuk pat Aizi ana htang maja mu htam hpung ni e garum shingtau madun matsun ai gata hta, Man yin Hpaichuso ni hte jom pong hpom la nna, ka-ni hpro lu, ka-ni hpro dut re masha ni hpe tsan lajang bang wa ai rai yang, 2007 ning shata 8 du yang, Husong gahtong ko ningtuk rai lu ai dut ai masha langai mi mung nmu tam shapro sai hte maren, ningtuk rai hpe atsai awai shamyit kau lu sai majo, Htaihpyin gat mare ting hta na nambat 3  ningtuk nnga ai gahtong byin lu sai. Ya daini, ningtuk nnga sai gahtong  go nguipyo wunli lu sai hte maren, Husong gahtong ni go shong de na zon pru hkom mat wa yang nta chyinghka zo nhkat da ra ai hkringhtong bai awai la lu masai.
   Hpaji ningli shalik shapan nta go myi na shawa nta ndo yang ko galo jat gaba la ai hpri bro galup ai nta re, lamu ga man go mida man 450 du nna, arang gumhpro go lap 92500 galo ai re. Dam san ai nta gata hta, ginsup mung mai ka re pinra masat da nga ai, nta shinggan ko shat gok mung galo jat da sai. Hpaji ningli shalik nta galo ai ko lang ai arang gumhpro go Yinkyang ginwang Kunghpan hpji ginsup gon dap ni lap 48000 garum jo, mungdo ningtuk pat Aizi ana htang maja dap ni lap 30000 garum jo, Husong gahtong ni lap 14500 la shapro rai nna galo shangut la ai re. Daining shata 5 htum wa de galo hpang nna, shata 7 pro de lu galo shangut la sai hte maren, Husong gahtong ni zimra ngui pyo ai hpong shingra go maden, hpong shingra masa hkaimu gahtong ningnan go maden sa wa ai hta lahkam ningnan langai bai htot hkrat wa lu sai re hpe shadan dan lu nga ai.
Hpaji ningli shalik shapan nta ding- shon sa hkalum lom ai du salang ni hte manam ni hpe, Husong gahtong ni go, Jinghpo htunghking hku nna shat lit hte hkap hkungga tau la ma ai.
Husong gahtong jahpan jep masha Hpaudau Gam shachyen dan yang, hpaji ningli shalik shapan nta a akyu jashon la, gahtong masha ni hpaji ningli shalik shapan nta galo sa wa yang lachyum rong  na matu, gahtong na ningbo ni go udi bonglung gasup saboi lahkong hte umun bolong ni mari ton ya nna, gahtong masha ni hpe sa gasup chyai shangun na hku re nga u ai.
Shana, Husong gahtong ni tinang shalat shara la ai zat ni hte sa hkalum shapyo lom ai Lunghpum mare salang rapdo Nambang gahtong ni la sa ai zat bogram 17 hpe gahti galai rai pya dan nna dingshon poi hpe grau nna shapyo dat sai. Dai hpang, yong yong nhtoi htoi hkra htongka bai jom ka pyo chyai ma ai.