Husong gahtong ningbo ni tsun ai

N-gun atsam dat nna  hkaimu masha ni hpe gahtong ningnan woi go maden hkrat wa na

Husong gahtong ningbo masha ni go “Magam bungli sharot, gahtong nhton laikyang kunghpan, gahtong san seng, gon lajang gumrong gumtsa” ngu ai hkaimu gahtong ningnan go maden gumhpon hpyi lajin hta hkan let, madu gahtong na masa hte gapyon nna, shawa masha ni hpe hkaimu gahtong ningnan woi go maden bang wa nga ma ai.
Magam bungli sharot ai lam hta, 1. Naimam hte sutgan hkai nmai madung rai nga ai kumshu hkai nna, htingra hkai nmai ni no hkai na. 2. Sutgan hkai nmai ga-hpri hte gyenko hkai na, ya yang gahtong hta ga-hpri gyenko hkai mu magam ngut kre mat wa sai hku re, rai tim, hkai na lakung lama lu ai ni go dingyang no hkai na. 3. Noikrat hpun hte hpa-lap, ga-hpri, gyenko gapyon hkai hkrat wa na. 4. Ten lado nlata ai mai hkai ai U wa yo na hkainu nhpre tut e hkai sa wa na.
Sutsu nga mai lam hta, naimam hkai nmai ni hkai ai hte rau, logadat hpaji hte rem lu rem sha mu galo hkrat wa nna, gahtong masha ni a ja gumhpro lo jat wa shangun na. Madung go wa hte U rem na, wa rem yang logadat hpaji lang nna, wa shat nshadu ai gatsing hkrai yo na. U hpe mung rong nna yo hkrat wa na.
Gahtong nhton laikyang kunghpan lam hta, gahtong masha ni hpe hkam gaja chyoipra ai laikyang woi matsun madun lang hkrat wa na. Kyet shop ai hte gahtong shawa masha ni hpe kunghpan chyoipra shamu shamot woi galo, hkaimu gahtong masa hte masa tara woi sharin achyin let, nguipyo zimra dinghku de na myit jasu ya, gahtong masha ni logadat hpaji hpe kam, n-gaja ai htunglai lai kau, n-gaja ai laikyang ni dom kau, ningshong sho ai myit jasat hte gaja ai sari laikyang sharot hkrat wa rai nna, machye machyang hpaji lang ai hkam gaja ai nga sat nga sa ladat lang hkrat  wa nhtom, gahtong hta kunghpan chyoipra ai gaja ai hpong shingra lai kumla byin wa shangun na.
Gahtong san seng galo ai lam hta, n-gun hte tup rai kyindut ai nga sat nga sa npot nhpang hkrang go sharot nna, gahtong na nga sat nga sa grup-yin shara hte gahtong nsam gram sharai hkrat wa na. Shawa namdum langai galo nna, gahtong masha ni namsa nmanu ai manghkang hpe hparan kau na. Ya ja lu nga ai hka na hka hku de zaibru nau lo ai majo, hka hkrai pat mat mat rai nna, gahtong masha ni hka lu hka lang na hte U wa ntsin lu lam hpe grai wa chyinghkyik ya ai hta n-ga, hka ko zaibru lom nna hkamja lam hpe wa-hkye hkra na tai ai majo, kaga hka lui ama hkam lu ai, gaja ai hka npot langai no tam la nna, 2009 ning ko lu shalen la hkra shakut na. Chyauhkyi nsa galo nna, Ulong, wa long, namdum, shat gok ni gram galo la na.
Gonhkang gumrong gumtsa lam hta, gahtong shawa masha ni a gumrong gumtsa ahko ahkang makop maga ya, shawa mu lam shawa masha ni hpe chye shangun, gahtong na myu magup re manghkang hparan kau ya nna, gahtong shawa masha ni hpe nguipyo zimra ai hpong shingra galo shalat ton ya na.