NGANVUNG MAU “5ZHUNG WUIYAK”MUMO PIRAN GEWANG MYANG BE

Mikon mingui zuppong ma《Jvoshu ngvui》 mikon byvaq shit zhiwo.

wap ma lusik   Nganvung mau“5zhung wuiyak”mumo dap zui lo e mai, Mau dang wapdoq、Mau asuya wapdoq mai cuq dvo e mauyam“5zhung wuiyak”mumo shuizui nvikbo pung, amu zui nyan paqzhi lago myitpyi dvottoq lo mu, amu wunwo ri lago se qang yu, ada da apung pung gvut gam mu amu zui zhiwo ma lo kat chang zhep lving, amu lo dvunshit gvut gvimu, maugom ginwang myuq kangmo ma amu zui e gewang zhaq myang be.
Mvoqshit qo, “Zhong 9zan ban doq shoq(pujiu)”amu wo zui ge be. 2007zan maugom dviq zvang zhong ongtoq zhongzo joro zvang zhong wo doq e 96.57%, joro zvang zhongzo lazan zhong adoq loq gvut byuq e 6.3%.Sara bve wum o sai gvat lui, maugom ma sara paqzhi luq e dviqzvang zhong 97.3%、 joro zvang zhong 98.03、 dvanmyvang zhong(gau zhung) 94.6%、zhimu paqzhi zhong 59.24%. 2007zan zhongsai ngun zang tuklvung e 2835mun, saisai e、asik sai e 33000pyinfang myi.
Sanseng chimu qo, Aizi no gam amu dingman wo zui, daplvum no gam ya e、 likdik zui ra e amu bve wo zui ge lui, nolai lvoqdvap qo zhaq wo gam byvam be.Yo muzui mau hoqzo yiliau amu sai zui tan lo mu, maugom 75mun yuq hoqzo yiliau bilom be, byu mun chi sara yo muzui mau ma sanseng chi mumo lo kat zui lui, chimu zui rungwap bang e loqmu loqtang zhe dap be.Yo muzui minbyu e no wu no ya wuiyak qo sai piran ra dut dvo ashi.
Laili paqzhi qo, lalvum laili paqzhi yvum sairvang ra dut ra, maugom ma wo sai dvo e laigva wu zhang 6lvum, laili paqzhi wu sup gvun zhang 7lvum,laili gon lazhang wap 6lvum, sumlvo paqzhi samlik zhang 1lvum, xangzhin laili paqzhi wu sup gvun zhang 13lvum, sai nyi e xangzhin laili paqzhi wu sup gvun zhang 28lvum, wapung wakau laili paqzhi wu sup gvun zhang 505lvum, zatgo pung 407lvum, yo muzui mau ma datshin gvat e 61lvum.   Haului, mau、ginwang、 mauwa、 wapung 4zvang laili paqzhi byung worot wodut be. 2lvum amyu laili paqzhi sik  wo lvoqtoq hi be. Mau zat byvaq pung mai byvaq gvo e 《Nan xi zha》ga e zat, saghi cik mingdan gom dviqzo amyu zat byvaq arong hing nambat zhvunghuq ra wo be. 3lvum zat bvaq pung bang wapung kangmo ma 650dam lo zang byvaq shit bi-gvo, zat zang wu e mingbyu wui 70yuq mun dam.
Tebyvo datwup qo, sanghi da“Wa kangmo rot”ga e mumo 525lvum sai be, 12mun myit mingbyu tebyvo jo datwup wu wuiyak qo wo piran be; Luxi Beiyvin bum bve ma fasheq tai 7lvum asik saisai sailvam dvo be. 20yvum atoq bo e wa ma tebyvo datwup wo lvoq rot byi be; Zhvung wapdoq、ming mai amyu mying mai puqjvo zhakze wui ra ngun 325mun ho dvo u ngvut le. Zhvungwap、ming zvang tebyvo datwup wojo myang wu e 93%、93.1%, yo muzui mau mingbyu “Datwup wu tebyvo jo wuiyak”qo sai piran ge ra dut dvo ashi.
Logidat zhimu qo, 2007zan, maugom ma mukat 3lvum mingdan logidat zhimu ma haplvung be、mukat 24lvum ming logidat zhimu ma lvomlvung be,tukchung ngun 1240mun; Mau zvang logidat zhimu kat ma lvomlvung e 34kat、ngun 50mun pyaige dvo be.Yo muzui mingbyu ri logidat zhimu 1257dam 142090yuq da zang mvoqbvan be; Logidat zhimu  mai ho shit zhvam yo 17lvum 8950mu,logidat zhimu mai ho zhvam yvum 250yvum. Mau、 ginwang mai zhimu byu 51yuq pai nvang gvat lui lo mvoqshit be, xangzhin zhimu dvunshit byu 153yuq wo mvoq nyvi dvo be.Yo muzui mingbyu“Zhimu mvoq yak”qo sai piran ge ra dut dvo ashi.