Nnang non yang gan hkye la na hpaji ni

●Nnang non gan non wa ai shaloi, myit nmai tin ai, gaja dik ai ladat hte tsin-yam koi gam kau na. Nta dinghku shing nrai tinang mung lusha, nong e lang ra ai rung rai hte atsi ni hkyem lajang ton ra ai.
●Nnang non hpe gara hku hpaga na: Nnang non ai shaloi, dum nta ganan ashun wa nna, masha yong go kyin hkrit nna shinggan de hprong ma mat wa rai nga ai. Ndai zon re ladat go shut nga ai. Shong nnan e myit ni azim sha rai ra ai, nnang non ai masa ko yu, mabyin hpe lawan ladan hpaga shapro rai chye ra ai. Ani sha ko nnang non ai rai jang, lamu ga aja awa lawu lahta rai ganan wa, pai hkra rai ganga  ganon wa, masha lam nmai hkom mat, grau nna go nmai tsap mat rai nga ai. Ani sha re ko nnang non gaji gan non wa yang go, aga ganan ai hte pai hkra ganga ganon wa ai lam nau ndan nga ai. Tsan ai ko nnang non non wa ai shaloi go, shong nnan e lamu ga lawu lahta rai ganan wa nhtom, sekan gade a hpang go pai hkra rai ganga ganon wa nga ai. Tsan ai ko nnang non gaji sha non yang, lamu ga ni pai hkra rai ganga ashun wa nga ai. Nnang non byin wa ai shaloi, lama dum nta loi sha ashun ganga wa jang go, tsan ai shara ko nnang non shing nrai nnang non gaji sha rai nga ai.
Nnang non gaba wa na shong e, masha hku nna mai maram shapro ai lam ni nga ai, ga shadon aga gata na hka lai wa, dusat du myeng ni a alai ni shawoi na hte nbung mat,lamu nsam, aga ningja, aga nsen, aga abat, aga hku samui mong, aga gahtet gatsi re ni shawoi na hte nbung mat nga ai. Nnang non gaba wa na shong e lam ndai ni yu maram hpaga shapro lu ai hpe go, nnang non na shong na mabyin masa re ngu lu nga ai. Rai tim, mabyin masa ndai ni mu hkrup ai shaloi, teng n teng hpe no hpaga yu nhtom, seng ang rung dap de sa shana nna hpaga shateng na.
●Nnang non koi yen na hpaji: Nnang non byin wa ai shaloi, shinggan ko nga nga ai masha ni go, shara dam ai de alawan sa hprong nga mat ra ai, mahkrai, dat shado, dat sumri, bum sharut n-gam, dum nta ni hte tsan gang ra ai. Lama aten manu nna nta ko na hprong pru wa lu rai jang, asat lawan ra ai hta n-ga, arung arai ni dihkrat wa nna tinang a abo hkra ya na hpe makop gaja ra ai. Nta htap ntsa ko nna nmai gahkan yu wa ai, pru lam lawan  tam, nta na namdum, hka shin gok, shakum shingjut shingno,ngang na zon re lang hkingrai hkan gan shingbyi nga nna, nnang non hkring  ai hte pru mat wa na. Ma chyangai,ma gaji ni hpe pon ba yang mung atsom sadi ra ai. Nnang non gaba byin ai htom hte nong e nnang non ai ginra na machyim ko yu yang, nnang non go aten gadun la ai majo, nhku gata ko koi yen yang grau gaja ai.Mahtang go nta nhku  na lang hkingrai makau,shakum gata maga shingjut, shat dap, namdum, hka shin gok,rung rai zing ton gok re shara hkan koi yen yang mai ai.
Lama nnang non ai nau n gaba jang go myit nmai kyin hkrit ai, ngang ai saboi shing nrai aku  gata ko gan koi yen kau jang rai sai. Lama ndai ten e gan hprong pru wa rai jang, kagam re dihkrat wa nna nhtang de adup hkra wa chye ai. Jak rung ko bungli galo nga re ni go jak hkingrai makau, ngau rai ton shara re man ai shara ko gan koi yen na. Wandat, nhprang nsa, wan, hka, ningtuk nsa re ni mung dom pat di  kau  ra  ai.  Sharut n-gam,  nta  gaba,  ahkrang gaba tso ai gogap rai, shara kyipkyeng ai gat lam ko nna lawan pru wa mat ra ai, wan dat shado, machya, wandat sumri, bum mason hte tsan gang na, bo shagu re mahkrai ntsa hte gata, hka bunghku ko nmai nga ai.Modo mung hkring mat ra ai. Jong gok htap langai na jong ma ni, chyinghka lam makau ko bai ang  re ni go, jong nhpye hte bo makop nna shinggan de alawan mai hprong pru wa ai. Gaga ni go sara matsun ai ko hkan nna, sara hte rau saboi gata de koi yen rong mat na. Nnang non ai shaloi tsi rung rong ai machyi masha ni go, lawan ladan rai nba shing nrai bunghkum hte abo ahkum  makop nna, aku shing nrai kyip ai agok hkan shong koi yen rong nga nna, nnang non hkring ai hte tsi sara ni matsun ai hku nna hprong yen mat na. Shawoi e tinang nga shanu mu htam ai shara na chyinghka hpo, la,laka tso nyem, pru shang shara ni atsom chye ton ra ai, tinang hkrai hkye hkrang la na ladat chye ra ai, nambat langai lang non ngut ai htom alawan hprong pru mat wa na. Nnang non laksan ninghkring ni hte nnang non gaba hkrum sha yu ai ni  maram shapro ai:“ Nnang non gaji hta hkum hprong, nnang non gaba hta go nlu hprong ai” nga ai ga sadi hte machyim ni go, dai shaloi, dai ginra tinang hkrai makop maga hkye hkrang la na nga ai lachyum re.  Grau ahkyak ai lam go, nnang non lo byin ai shara ko nong e ndai hte seng ang ai hpaji ni hko shabra sharin ya nhtom, hkye hkrang makop la na lam ni shaman, nnang non makop na ubadi, tara maka ni sharin ya nna, tsin-yam byin wa ai shaloi, sum hkra ai lam shagrit kau lu na.
 ●Nnang non byin ai htom hkye hkrang na lam: Lama nnang non ai htom hpungkro ko lup rong mat yang,myit azim sha rai nna,  ganing rai tim hkrung nna pru wa na nga ai myit da-ting ton ra ai hta n-ga, masha e sa lu hkye la na hpe kam sham ra ai. Shong nnan e tinang a ata lahkong hpe shong sho la nna, tinang nan hkye hkrang lam galo sa wa na, nnang non gaba a hpang nnang non gaji grai no hkan non nang re majo, ningma nnan bai hkra na hpe sadi ra ai.Ata lu sho la ai htom  myi-man, shingda, n-gup,  ladi makau hkan na maza ni gatsut sanseng kau na, nhprang salu hte gaga abat ni shing nrai ninghpu nau mong jang, manu ai rai yang bu hpun palong shabam la nna n-gup,  ladi ko magap  kau na. Tinang hkum ko hkra wa na zon re rai hpe koi yen kau ra ai. Makau mayan hkan  lusha mai na zon re rai ni hpe tam sha na. Tinang hkum ko gun nga ai wanhkret ni majoi nmai hkret shachyi ai,makau mayan hkan hkru chyi wa na hpe tsang ra ai. Wan dat sumri hpe mung nmai masop ai. Ladat sho nna shinggan na ni hte makyit mahkai na lam tam ra ai, masha a nsen na tim majoi hkum maron jahtau,hkye hkrang masha ni na na matu, nlung  re ni hte shakum hpri tong zon re hkan akok shangoi nna  shiga shana na.  Tinang hkum   n-gun hpe atsom  zing ton nna, san ai maga hku hkom pru wa na.
Lama chyahkring mi na lapran sha nlu pru wa na zon rai jang, myit mi azim rai la nga na. Hka ntsin n nga ai shara hta rai jang tinang a ajit mai ji lu ai. Lama ningma hkra la rai jang, mai gayop na zon re hte gayop kau nna, majoi n shamu ai sha hkring sa nga na. Lu hkye la ai htom, amyi hpe a tsom makop kau ya ra ai,ajan ni hte nmai htong gasheng hkra shangun na. Shat sha hka lu re shaloi mung nau nmai dinglai ai,shat kan hten wa na tsang ra ai. Lama hpa ningma nhkra ai ni go tsin-yam hkye mawai mu hta kyet kyet shop shop rai  hkan galo nang ra ai. Hpa majo nga yang, nnang non ai htom jang gaga shara hkan na masha  alawan nlu du sa wa ai,tinang ginra na  ni shada garum la nna alawan hkye hkrang hkrat wa ra ai.
●Masha hkye na lam: Hkye hkrang masha ni tinang hte ni nna bai hkye loi na zon re ni hpe shong alawan hkye na, ga shadon nta lawu tsang na hte ga gata gok na sak no hkrung ai masha hpe. Hkye hkrang bandung go masha lo gahkyin nga ai shara ko rai na, “Tinang a hkum ”hpe shong hkye nna, “Gaga masha” hpe bai hkye na, sak hkrung nga ai masha hpe abo shong shakra ton ya nna, nsa sa pyo shangun na, wa-ngan wa-ja  ni hpe shong hkye la nna,tsin-yam hkye mu hta n-gun  atsam dat shangun na. Lup rong nga ai masha hpe mu jang, tai masen ai hkingrai hte nmai chye alai ai. Hkye hkrang sa wa ai shaloi hpa mu n pru na matu, chye alai ai shaloi madi shingdo nga ai rai ni hpe nmai jahten hkra kau ai. Gata e masha lup rong nga ai chye jang, lawan ahpre wo nna nbung nsa jahkrang ya na.Ntsin, lusha shing nrai atsi ni shong sa ya nna, hkum shong awai la shangun na.
Lup rong nga ai masha hpe hkye ai shaloi abo shong shapro la nna, n-gup, ladi gata na maza ni san seng ya ai htom, shingda akan hte gaga ni bai shapro la na. Tinang hkrai nlu hkom pru wa ai ni hpe go, hkum yong kra pru wa ai htom she hpai shapro la mai ai, majoi nmai gang ahkye shapro la ai. Aten na na sin ai, nsa n hkrang tsom ai,hpang gara hkrum re masha hpe go, hkye shapro dat ai shaloi myi magap kau ya ra ai, agajong sha nbung nsa lo wa  nmai  marop  shangun ai  hta  n-ga, lusha lo wa nmai sha bang ai. Ningma laja ai masha hpe go, tsi rung de alawan sa bang ra ai.