NGANVUNG MAU MA LUNGSENG SUTZE RINGZHAT EQ ZHUNGGO RUILI MINGGVAN LUNGSENG LAILI BVOI WANG RA ZUPPONG PONG BE

Zhaujvin gi myvangzvang paqzhi mang Li Wunyen ri zhichung lakmat byi ra.

wap ma lusik 8qap 14nyi, Sakung mau Lungseng sutze ringzhat eq Zhunggo Ruili minggvan lungseng laili bvoi wang ra zuppong mo Ruili ma pong be.
Zuppong ma lazhvum midung gi: Mulik zhilik qom zving, sat lawat ri wu wu, maugom ma wum-o qom yu, banshoq bang unuq ra zving, nganvung mau lungseng sutze ringzhat qo ho toq, maugom ma lungseng sutze ringzhat mu pyai dvo, Zhunggo Ruili sanghi cik minggvan lungseng laili bvoiwang ra pyai dvo, Sakung mau lungseng sutze ringzhat ra ma qokang qomo wum tuq ge, Zhunggo Ruili sanghi cik minggvan lungseng laili bvoiwang ra myit qom, muzui ra gam ge, wum-o byi dvo ra ngvut le.
Zhaujvin、Yi Mayo、Liu Wusan、Ten Dvayi、Yang Yaugo、Fan Yaupyin、Chin Zhinchung、Yanghung、Pu Jvinfu bve mau zvang ma nvikbo wui zuppong wapdoq ma zhe zung be, ginwang myuq kangmo ma midung nvikbo、Lungseng bvoi gvut ra hen e sengang rungwap midung nvikbo wui、Maugom lungseng muzui bang e gungtai bve 300yuq myit zuppong ma bolom be.
Mau anum muwun wapdoq zau、Mau mudve zau、kojvo rung zau Ten Dvayi gi zuppong muzhvung zui ra, mau wapdoq ningbo Zhaujvin gi bvoiwang ra qo dang dai ra. Mau anum muwun wapdoq zau、anum muwun mudve zau Liu Wusan gi muzui ra pyai ra.
Zhaujvin dai toq gi, Lungseng sutze gi nganvung goidvu isam zhe qang eq ringzhat wumbo dvo e ge e sutze, lungseng sutze ri zhe gvut zhe gvo, laili sutze ma za gewang bo le angvut, maugom isut igan pongshingra ringzhat qo ma aqak lazhvum bo dik le.Nganvung mau lungseng ringzhat qo ma diqa mili gewang bo le, myodik e cangpun ze, myang dik be minggvan wuiloq labau、nikdik e lungseng laili eq gvo dik e lungseng gaizhang, Ruili gi minggom ma lungseng myo zhang yvang ge dut le. Xi ila zan, gungzhung byu bve gomau bantoq byuq sutze ung toq qo lago awo dut, gaizhang alvum wo ye; ze ge ri jeq zhvoi qo bve alvum gvut ge mu nganvung mau ma lungseng sutze awo ringzhat, dangge mu isu za jo lo zhang, nganvung mau ma  lungseng sutze ring- zhat qo gi yvoyvo mai dat byuq lo le,“Qamkau banbo bo qam yam banbo hom”e sat lawat gi dum ling dvau ra wui le. Haumu, zhe lagvam imyit ma wui e qo bo ra dut le, ge eq age ri wu se, maugom ma wum-o qom yu、banshoq bang unuq ra zving, ge e yu toq, diqa isam lvoq toq, teptep za lungseng sutze ri ringzhat, lungseng sutze ri zhe gvut zhe gvo, Sakung mau ma lungseng mying wo hu shoq.