YINJVANG GINWANG“BUIWANG QAM”QO MYINGZUM SARA MVOQBVAN ZUPPONG PONG BE

Xiqap 13nyi mai 15nyi zhe amyu、 myiwa mying zum wumtung sara mvoqbvan zuppong Yinjvang ginwang ma mvoqshit rung ma pong be.
Xidam le bolom e myingzum wumtung sara banshoq 75yuq bo ra, haugu ma, Sam、 Myiwa mying zum sara 42yuq, Shidvung、 myiwa myingzum sara 17yuq, Zaiwa、Myiwa myingzum sara 16yuq bo ra.
Mvoqbvan pung ma mvoqshit rung mvoqchung laigva zhvungsing zau Liu Yizhung、mvoqshit Samlik wap ma zau Yin Kexau mu e sara bve ponghi dang le dai agvo, yvangmoq dai e gi nganvung Sakung mau ma Sam、Shidvung、Zaiwa eq myiwa myingzum mvoqjo lo e labau gi 21zan bo be. Hau mizho mai, Yinjvang ginwang Sam、Shidvung、Zaiwa amyu zo bve nyi e wa zhong ma amyu zhongzo bve gi amyu、myiwa myingzum mvoq mu myiwa laigva mvoq qo ma jai gvo e ongdang arong bo lai lo e labau bo be. Haumu, akui mai Yinjvang ginwang Sam、Shidvung、Zaiwa zo bve nyi e wa zhong ma, wum mo gvat zhat mu amyu、Myiwa myingzum chung lui, Myiwa laigva ri zhe wo mvoq zhat shoq ga dai agvo.
Mvoqshit rung mvoqshit samlik wap ma e Sam、Myiwa myingzum mvoqshit sara Zhu Bauzhan、Shidvung、Myiwa myingzum mvoqshit sara Wang Jinyin、Zaiwa、Myiwa myingzum sara Doqshi Mu zhven bve gi, Sam、Shidvung、Zaiwa 3pung gvut gam mu yvumsing amyu mying laigva paqzhi ri wummo gvat mu chungyung mvoq zhat lui, myiwa laigva ri arong zhe wo mvoqtoq shoq, amyu myithui laigva ri zhe wo wui zhat wu shoq ga chom mvoqshit bigvo. Hau mu lui, xidam mvoqshit mvoqbvan le bo lom e amyu、Myiwa myingzum sara bve banshoq bang imyit ungkau ma yvumsing amyu zo e mying、laigva ri wummo gvat mu mvoq shigut lui chung zhat e lo ra ga gvat dvo mai, amyu、Myiwa myingzum chung zhat、mvoqzhat lui, Myiwa laigva ri arong zhe wo mvoq zhat toq shoq mvoq e lo ra ga ri myithen chung bum bigvo.     
                                 (Gvasu Chutlut Lashen)