MAU DANG WAPDOQ EQ SUYA WAPDOQ ZHEPGON PUNG YINJANG LUNGCHON MA LO ZHEP GON WU LUI

SIKWA YO GONSING DVIRVA KUQLAI MU EQ MYINOQ DON AIZI NOGAM LOQMU LAGO ZUIGE RI YOMU MAU ASIK ZUIRING DOQ RA QIGVAM HAN TOT SHANG GA DAI AGVO

Li Xinshun mu e zhepgon pung bang Lungchon ma kat wu nyi agvo ngvut ra.

yvumsing wap dang lusik Xiqap 13nyi mai 15nyi u ri, Mau dang wapdoq mudve nvikbo Li Xinshun mau dang wapdoq eq suya wapdoq byu shui ri Yinjang, Lungchon ma yomu mau asik zuiring lo e qo yomu mau sikwa gonsing dvirva kuqlai eq myinoq don Aizi no gam mu lago lo kat zhepgon wu agvo. Zhepgon pung bang: Sikwa gonsing dvirva kuqlai mu eq myinoq don Aizi nogam loqmu lago zuige lui, yomu mau asik zuiring doq qigvam han tot lawan ri, nganvung mau yomu ngunze myo zui ho, yomu byu ngunze myo wo yu, yomu mau zumra, shehui rapra ra dong gvut shang ga dai agvo.
Yomu mausik zuiring doq mu gvut   zhvam wu zhiwo Yinjang ginwang Xinchin xang Gongbyvin cun Xenmau cun tumwa kasu ngvut e, Xinchin xang Xinchin cun auzhu jengo shi yo ge age e, Pyinyen zhin Mungzhan cun gapyi yo, Yusunglin Chuntu tang cun sikwa gon sing dvirva kuqlai qo, Lungchon ginwang Husa xang Baupyin cun Lvaqi cun eq Jingkan zhin Mvanron cun Zhenpo wa mu e bve ka qom kat wu agvo, ginwang、zhin、wa nvikbo、mingbyu wui lvom daijvo gvo e lago jo yu le gvut agvo.
Zhepgon pung bang myoq eq lago kat wu no eq lago dum sai jo yu e mai, Yinjang eq Lungchon ginwang bang sikwa gonsing dvirva kuqlai mu, myinoq don Aizi nogam mu eq yomu mau asik zuiring doq lo e qo gvut e ge ra ga dai agvo. Mingzhvung dang wapdoq yomu mausik zuiring doq ra dang laigva“20cham”dvirva eq yvumsik、zhiwo sik、zuiring saidvo e qo、amaq kam mu、tumwa chom gvut byi mu、zuicong lo e qo bve mai le dai gvat zhang, xi 2 ginwang bang zui e lo e loqzo ge ra ga.
Li Xinshun mudve nvikbo ga ri, sikwa gonsing dvirva kuqlai ri, yomu byu sikwa yo yvumsing e gvut yu lui yvumsing yvang lago myang gon zo zhang gi sikwa mai ngunze ri wo ho yu, gewang myo momo. Sikwa bumyo yomu byu e loq ma wang zhang yomu byu gewang bo dik be ga.
Li Xinshun nga- nvung mau sikwa gon sing loqmu zui e lo e qo eq shodvu  wu ri sai dai le dang gi, zvangkang ma e dang wapdoq eq suya wapdoq bang loqmu xi lago sai gvut ge ra ra le; sikwa gonsing dvi-rva kuqlai loqmu zong lago sai pewu lui, loq mu kamai zuiwang ra qo ho mu, lui e hi gvut wui e tang gvut, kawa hi ge gvut nvo du zhang kawa mai hi gvut e lo; sikwa gon sing dvirva kuqlai mu ma dai dvo e dong mai chang lui, mingbyu wui myit mu, suya myit mu ra qo gvut ra ra le; sikwa gon sing kuqlai dvirva eq sikwa gonsing kuqlai mu u mai chang ri, sikwa gonsing kuqlai dvirva mingbyu wui ri han jvo zhe ri, sikwa gonsing kuqlai loqmu han bizui wang nvang ra ra le; sikwa yo gonsing lakmat qang za gvut byi ra ra le, loqtang age dvo; sikwa yosing lago ho ra dut le, midung gi hikun o bve e ngvutzhang o e gvut, byu wuiyak e midvu myo myit byi ri, mu alvoq toq ra qo piran ge ra ra le, mingbyu wui ri mibyoq mu age lvoq toq byi.
Ximai, myinoq don Aizi nogam mu 3zan gvut e lo e mai zhaq num lo be, akui age sai dvoq lo nvang, dingyang lago sai gvut ge e lo ra dut ashi ga agvo.  
                        (Puqgva su Mumvau)