Yinkyang Suden ginwang do ko tsang 5.0 du ai nnang non non lai wa sai

Madu dap shiga Mungdan nnang non maram dap ni maram shapro dat ai ko chye lu yang, shata 8 nhtoi 20 ya nhtoi mahka hkying 5 manit 35 hta, Yinkyang ginwang Suden ginwang do Hobyen gahtong dingda maga deng 1 hta tsang 5.0 re nnang non non lai wa sai hte maren, nnang non npot sung de go deng 10 du nna, anhte mungdo shara shagu hta ganon hkra nga ai. Ndai lang na nnang non ndai Suden ginwang do hte makau mayan na ginwang do gat mare hkan na shawa masha ni a dum nta hpe loi wa-hkye hkra nga ai. Ya daini du yang, masha hkala hkra ai shiga garai  n na shi nga ai.
Tsin-yam sat lawat shiga shon shana dat ai htom, mungdo gaba, mungdo tsang shagu na woion ningbo ni go nnang non tsin-yam hpe grai maju jung ma ai. Mungdo gaba up ningtau Zhau Gyen Fang go, mungdo gaba asuya chyare du ningtau Chin Ji Go hpe, mungdo gaba nnang non htang hkye hkrang rung, shawa masha gonhkang rung, sutgan gonhkang rung, go maden zinghka rung re seng ang rung dap na muhtam hpung masha zahpo la nna, tsin-yam sa hkyehkrang na hku matsun madun dat u ai.Mungdo gaba nnang non hkyehkrang rung na ni nnang non laksan hpaji ninghkring masha marai 30 hprai dat nna, dai jahpot na-yi hkying 7 hta Hkunmyin ko nna Yinkyang de tsin-yam hkyehkrang yu wa shangun masai.
Mungdo pati rapdo mu madu Jau Kyin mung tin shapun rai matsun madun dat nna, Li Sung Lin, Lu Wu San re ni go mungdo pati rapdo, mungdo asuya hkan na muhtam hpung masha ni hpe woi nhtom, tsin-yam mu pru shara de sa du nna sat lawat ni sa jep yu, dai shara na shawa masha ni hpe sa gawan re hta n-ga, tsin-yam hkyehkrang mu mung no sa matsun madun ma ai. Yinkyang ko muhtam nga ai mungdo pati rapdo dinggrin salang, mungdo pati rapdo chyare ningbo Hpan Yau Hpyin mung tsin-yam hkyehkrang mu sa woi matsun madun lom u ai.
Ya yang, tsin-yam hkyehkrang mu dangam no galo sa wa nga ma ai hte maren, dai shara na hpong shingra masa hte shawa masha ni a myit jasat mung grai zimra nga ai.