ZAIZO YUQKUN TE——byuzum dai e zhvitnau yuqkun te

zumgo bing dve yuqkun te
A:Mau pan sesu nap mai,
B:Sepan zvowq nyi mai,
A:Ulung mau mu lui,
B:Zhangdam myi gvut lui,
A:Ulung mauzam zvam lui,
B:Zhangding myizam zvam lui,
A:Ninggon mau mu ung e,
B:Shiwa zhvung zum ung e,
A:Ulung bumzum zung e mau ma,
B:Labyvi langzum yui e myi ma,
A:Ming wun zauzum toq e mau ma,
B:Dan wun pozum toq e myi ma,
A:Buibik zhvoi e mau ma,
B:Lvocan zhvoi e myi ma,
A:Shiyuq lacung bum bying mau ma,
B:Ngvoqmyuq labyvi kung bying myi ma,
A:Ngvomyuq sunluq mau ma,
B:Pungchui wangban myi ma,
A:Myvangmo gvoqlam mau ma,
B:Ne-mo bundo myi ma,
A:Mauyung chamjo mau ma,
B:Jvoshi cham lvo myi ma,
A:Ngunwang zhvoi e mau ma,
B:Hingwang zhvoi e myi ma,
A:Zoluq zozhvan mau ma,
B:Wutluq cau zhvan myi ma,
A:Ngunzhoi ukuq e mau ma,
B:Gozhoi myiwap pau e myi ma,
A:Atung chin zo mau ma,
B:Akam wui shuq myi ma,
A:Advun mau bo mau ma,
B:Amut myi wo myi ma,
A:Nyige yapkap mau ma,
B:Wangzan yuqyo myi ma,
A:Yuqzo yuq-o ji e mau ma,
B:Byizo byicam zan e myi ma,
A:Byuze zhvung hing mau ma,
B:Wado bun hing myi ma,
A:Wawam luye mau ma,
B:Tumram byiye myi ma,
A:Mauzhvit ung bvanse mau ma,
B:Myizhvit ung sakung mau ma,
A:Gauming gazhai e,
B:Gaudan gumkong e,
A:Wunbvong go lo zum mai,
B:Zaizo tungking um mai,
A:Zhvitdap nungnan nvun gvat lui,
B:Paudvap zhobyum chin gvat lui,
A:So nau qizvang yang lui,
B:Dangnau mvanpyo shup lui,
A:Ulung gaubum lut lui,
B:Labyvi gaulang kap lui,
A:Ungbui toq e shut mai le e,
B:Unglvo wang e shut mai zhe e,
A:Ulung mun shut mai le e,
B:Labyvi byin shut mai zhe e,
A:Myoqtang myvu myang nyi e,
B:Notang sam bo nyi e,
A:Ngun toq pau e buinum wui le ri,
B:Hing toq pau e zhinve wui le ri,
A:Wanyi gaupau mang bve le ri,
B:Tumnyi gaupyi myin bve le ri,
A:Walu zoshang wui le ri,
B:Bumlvum ngvoqzhvit wui ri,
A:Guwui mang wui ri,
B:Auwam qui wui ri,
A:Sun-gung zhvi bve ri,
B:Mayuq wvoi bve ri,
A:Lahing mung wui ri,
B:Lalam mo wui ri,
A:Nvammu muzhvit wui ri,
B:Moqzhvit lalvo wui ri,
A:Wawam luzve wui ri,
B:Tumram byizve wui ri,
A:Subyi awam byizo ngo,
B:Yvang gam awam mumu ngo,
A:Pauqi mo mvuq zo, Myvizo zhangnvam
      ngo,
B:Banting ngve mai sho,Myvizo banting
      ngo,
A:Bumdvui bumkap loq eq,
B:Langzhva langkap loq eq,
A:Paudvap loqlang lvom lang lui,
B:Zhvitdap loqjvam lvom jvam lui,
A:Gabu myit eq lvom dve yu le o,
Gara myit eq lvom bvo yu le o;
zaizo tungking zumgo lo e mvomyi
A:Go e sumlving zoquq moq e,
B:Yap e sumzhang zobying moq e,
A:Myvipo mvomyi chomjo wu shang ngo,
B:Zumgo mvomyi chom jo wu shang ngo,
A:Akang mau pan sesu nap le,
B:Akang sepan zvowaq nyi le,
A:Buimau buizum go lui,
B:Lvomau lvozum go lui,
A:Buizo nangtang eq,
B:Lvozo nvamtang le,
A:Wacang myidam toq ma,
B:Gaunyvui zhangdam toq ma,
A:Zumgo bing zhi nvang lui,
B:Byvi mut bing zhi nvang lui,
A:Wajang zuigong,
B:Udvong banba,
A:Sinwa gvaisek,
B:Maipyen shaphe,
A:Mying ngon zvangngvu,
B:Lajung te mu,
A:Kunzhu upyu,
B:Yauyang zhi,
A:Langzhang zuize,
B:Ding sang lane,
A:Gankat gvukdui,
B:Gankat goirong,
A:Zum zung zhangje,
B:Zumjo pungjvui,
A:Ngvoqqik myoqne,
B:Lahui myi jum,
A:Ngvoqhu zhyup le,
B:Laqung ngap le,
A:Buizum lo shui go lui,
B:Lvozum lo shui go lui,
A:Buizum king byvo tang ma,
B:Lvozum king byo nung ma,
A:Dang nau dung dum byvo lui,
B:Nungdvau shang dum lving lui,
A:Shiyuq bum dvau zhe lui,
B:Lacung bum dvau kap lui,
A:Myvangmo gvoqlam gam ma,
B:Shilvo gvoqngvui byap ma,
A:Adau nowo goq lo gvut lui,
B:Langu dauno zhang lo gvut lui,
A:Zingyung banbo lo zhvup shuq lui,
Haqyung banbo lo zhvup shuq lui,
A:Buizum go e alik yu lui,
B:Lvozum go e abyvang yu lui,
A:Bumnvui ngoqzum lo go gvo e ga o,
B:Langngvui shangum lo go gvo e ga o,
A:Hau e maupan sesu nap mai yo,
B:Hau e sepan zvowaq nyi mai yo,
A:Wunbvong amyu zhvunghum ga o,
B:Zaizo zhvigve marum ga o,
A:Pogap ninggon wa gi o,
B:Myvigap zhayung numpyo ga gi o,
A:Waqzut gong mu yung yu lui,
B:Pelvam dunggong yung yu lui,
A:Mau bat budang zumgo hi e ga o,
B:Myibat ninglo zum go hi e ga o,
A:Hau e mau pan sesu nap mai,
B:Hau e sepan zvowaqa nyi mai,
A:Ninggon yvangzo bve,
B:Ninggon yvang shu bve,
A:Zoshuq nauhum amyu,
B:Wunbvong zaizo amyu,
A:Myvipo gapzvum coq lo lui,
B:Ninggon gapzvum coq lui,
A:Myvipo li chung lui,
B:Yodam qo chang lui,
A:Zaizo tungking zumgo lo e ga o;
zumbyo bing bvun yuqkun te
A:Myvipo gapnang moq e,
B:Yoqdam qochang moq e,
A:Zhvoiyung bvanlong bum wui moq e,
B:Neyung bvanse bva wui moq e,
A:Myvi gvut myvili go luq moq e,
B:Po gvut polai go kap moq e,
A:Zai mu sumbum luq lo moq e,
B:Gvut mu sumzhang bying lo moq e,
A:Byiyung bandvap long bve e,
B:Luyung lungzun wut bve e,
A:Go lo angu wum wun moq e,
B:Sot lo qiwa abying moq e,
A:Byu ngui cham chung moq e,
B:Nodving cham chung moq e,
A:Ngvoqngui jvang shin moq e,
B:Hutang jvang shin moq e,
A:Zhvitnau agun dang sang moq e,
B:O-nau tang kopik moq e,
A:Ra nau ora te zan moq e,
B:Ora zhe ra zhe ngon moq e,
A:Ora kunyung te mu moq e,
B:Ko gvat qingyung ngvat dvu moq e,
A:Sauyung ngvat dvu alan moq e,
B:Yauyang te mu anum moq e,
A:Luyung qitot tot lui,
              (Gvasu Chumlut Dvon)
         Tang da lvom wu coq aq