HINGNGVOQ MVOMYI

       Hikun byupo layuq qolat ma ngun  ngvoq ladu no gu myang zhvup e ga, ngunngvoq hau gi lagung e shomau ma ngunwik wik duqbo dvo lui, byupo hau yuq gi dai be ga:“Ngo kinvam lvang ximyvo zhvoigu ngvoq amyang wu shiq.”Hau mai yvum qo zhvup lo lui lago loya yu e ga.
       No ya nyi hau jiro ma, ngunngvoq hau gi buibui yvang ri mikon kon jvo gvun mu, byupo hau yuq gi ngon e buinyi lai nyi be. Lanyi ma ri gi yvumjvo chang ma layuq su byupo hauyuq e ngunngvoq le myang mu, byupo hau yuq ri xi toq zhe zhvoi, mikon ri xi toq zhe dat kon zhe ngon gu hingngvoq nyi ri ga dai jvo be.
    Haumai byupo hauyuq gi buibui hingngvoq ri za myit dvo mu, ngunngvoq kamyvo ngon gu mikon kon jvo ri ajo lo, imyit angon buinyi za lai nyi be. Lanyi gi byupo hau yuq gi kumpong mu, buiwang lo ri wu mu, hingngvoq zhvoi qo za myit nyi be. Hau kun gi, ngunngvoq no ri ge mu, lo ra hen dvo be. Hau mai ngunngvoq hau gi byupo hauyuq gung yam ma dang le lo lui zhe tang ladam le konjvo byvam dvo be, asu byupo hauyuq gi nvik ma wang shoq“Nangkon e mikon gi ngon ra, asu hingngvoq ri aqit, nang shomau ri zhvoi ra, asu hing ngvoq shomau myvo azhvoi ga dai ra, ngunngvoq mikon ban kon mu, byupo gungyam mai sumquq danglving lui, buiwang yoq shut dang lo be.
      Haukun zhang, byupo hauyuq gi buiwang zo le bui eq ngunngvoq ri zang tuq dvoq mu hingngvoq dut mu zhvoi dik e ri chang myang gvat be.
      Sumzvoq u le yuqge myiwe zo bve oi, nungmoq sanghi zum lo kun shidaq ajvang aban se lvum, myvang qo aluq, ngun ri myoshoq awo, zum e aqing ri amyang mu, nang imyit ungkau ma myit dvo ma ri awo zhe dat dut le. Haumu byupo hauyuq ja ka dut gvo, hingngvoq gi yvumsing gungyam ma nyi dvo ri ase kamu gvo.      (Puqsu Zauzha)