YVUP SU ZHI

(Y)
O yo e……
Anau sumtung laga lo ra,
Nga yuq lanu ngo.
Yuq nyi te jvo ladam gvat le,
Byi nyi samno ladam gvat le.
Xi e byi yvup sumbum toq ma,
Woq yvup long gan toq ma,
Nga yuq lanu du lo boq wui anyi kai?
Shuq lo shiwui azhoq kai?
Yuqzo lanu ngo,
Wang yvang wang so le le o.
Wang so le ri no lo qui tung ayo ra lvu?
Wui shuq qung lum achui ra laq?
Yuq yang kun ri yau yang kun dvu byi raq o,
Byi yang sam no byi raq dyvo.
Byvi zo munu ban wui e.
     
    (M)
O yo e……
Xe lut nyi lo ayuq lanu e,
Xi e byi yvup sum bum toq ma,
Woq yvup long gan toq ma,
Ting nvam byvizo munu nyi le o.
Akun xi lut nyi lo ayuq lanu e,
Byvizo munu du lo yuq wui angvut kai?
Shuq lo shiwui angvut kai?
Byuchang cikshap jvo wu aq koi,
Wa chang bun byvo jvo wu aq o.
Tingnvam byvizo munu ngo,
Cangse wo ma za se nau ra.
Luise qui bang wang ma za rot nau ro.
Ayuq lanu e.
     
    (Y)
O yo e……
Byvizo munu e,
Painvum yuqzo lanu ngvut le o.
Zo myi o ra,
Aban o ra.
Zo myi ka ma ngvu ra laq?
Aban ka ma ngvut ra lvu o?
Nga yuq lanu ngo,
Wang yvang wang so le ba dyvo.
Wang so le le,
Ting nvum byvizo munu wui e.
     
    (M)
O yo e……
Pai nvam yuqzo lanu e,
Adu bo wui nyi ra kai?
Ashuq shiwui nyi ra kai?
Adu mungnvam au wui nyi ri gi,
Gauwa boq dvam e aq o.
Gau bum shi ho e aq o,
Pai nvam yuqzo lanu e.
     
     (Y)
O yo e……
Ting nvam byvizo munu e,
Kimyin sun ge lalvo tung e ri,
Pai nvam yuqzo lanu ngo,
Gau wa boq dvam e ba ngvu ri,
Gau bum shiho e ba ngvu ri,
Lagong gan ze be,
Gau wa boq dvam aqit loq.
Ting nvam byvizo munu e,
Adu boq wui ri,
Ashuq shi wui ri,
Nganvung pang mang laso wap ma,
Layvup sun mui mu ra,
Lazhoq lungyo dvo ra,
Cang pang laloq nvang aq,
Lui pang dving dam kat lo nvang aq dyvo.
Nga byvi munu e.
     
     (M)
O yo e……
Pai nvam yuqzo lanu e,
Nang ngayuq lanu dai e dang tang chang mu lui,
Adu boq wui ri,
Ashuq shi wui ri,
Akui cang pang lai lo nvang be,
Je pang dving dam kat lo nvang be o.
Pai nvam yuqzo lanu e,
Wang so le aq koi o,
Wang yang le aq koi.

      (Y)
O yo e……
Tingnvam byvi zo munu e……
Ngayuq lanu ngo,
Wangso le ri,
Wang yvang le ri,
Boq lvom cau kan dvo be lvu o?
Shilvom zing zat dvo be lvu o?
Byvi zo munu e.
     
     (M)
Madin xelut nyi lo painvam yuq zo lanu e,
Boqlvom cau gi hai ri ngvu ra lvu?
Shilvom zingzat zhang gi hai ri ngvu ra?
Ngabyvi munu ngo,
Cangse wo ma ase o,
Luitung qui shin jvo wu aq,
Wacang shung ma,
Bun byvo jvo wu aq ma.
     
     (Y)
O yo e……
Tingnvam byvizo munu e,
Byilvom zingzat ze gi
Pigvang lai an tangzo ga nving,
Shilvom zingzat wang gi,
Hangwa lalik byang zo lvo ga nving！
Byvizo munu e.
     
     (M)
O yo e……
Painvam yuqzo lanu e,
Akui gi,
Boqlvom cau ze gi,
Noq mai kan dvo be.
Shilvom zingzat ze gi,
Himai hen dvo be.
Wang yvang le aq koi,
Pai nvam yuqzo lanu e.
     
      (Y)
O yo e……
Kimyin sun ge lalvo tung ri,
Kanvam amyang u myang gva zo eq myang lvum gvun e,
Kanvam ahui lahui dung jum zo eq hui lvum myin ri,
Tingnvam byvizo munu gi,
Nam ngon banyung ding ri,
Nga yuq lanu ngo.
Namnau ban se ding bve ri,
O nau byvizo ban ge su mu lui,
Pyuyung zhvunghuq zhet pyu byi le dyvo.
Nga e byvizo munu ban e.
     
     (M)
O yo e……Yaura o……
Pai nvam yuqzo lanu e,
Kimyin yvang ri dvi,
Sun ge lalvo yvang ri dvi.
Pai nvam yuqzo lanu kun ri jo zhang,
Byinvik sumbum buq lui,
Ye te tangchang ra su ga be dve,
Pai nvam yuqzo lanu myoq ri myang zhang,
O nau atang bansu ngam ro,
Xi e ngun bat darot wui kat gi,
Nang ri ngui e zhvitdap zhvunghuq gvut le dvo.
Yuqzo lanu oi.
     
      (Y)
O yo e……
Gvoi mvai e……
Tingnvam byvizo munu e,
Dvang gung lawoq po lvang,
Bat e dunggo be,
Dvun e mying bye be.
Lacung mau bo be,
Cummo lawun wang yap yoq zhe be.
Cangzo awam gu gang yoq du lo be.
Sanlan awam san lan qing yoq  zhe lo be.
Nga e byvizo munu e,
Napmyin dum hui goq dvi o.
                           (Doqshi Yongtang)