Shuili  hpaga  yumga  dat  gasa  hpung   ni myen mung de sa gawan ai ongdang ai hte shangut nna bai nhtang du wa sai

Sumla hta madun ai go ja sutgan gasa hpung ni ong dang ai hte nhtang wa ai re.

Madu dap shiga Shuli myu Myen mung de sa gawan ai ja sutgan hpaga yumga gawan hpung ni Myen mung hpe aten 15 ya sa gawan ai hpang, shata 10 nhtoi 24 ya shani shingtung e ongdang ai hte Jegau ko bai nhtang du wa masai. Gawan ai aten hta, gasa hpung ni go Myen mung seng ang rungdap ni hte mu lam 10 hta myit jom jahkrum da masai.
Myen mung ko nga ai laman hta, gasa hpung ni go shong hpang rai Lashu, Mandele, Myen mung gonjo ningnan Neipyito, Yanggung,Shidui, re myu manga ko sa gawan ai shaloi, Myen mung hpaga mu dap, buhkom dap, hkaimu dap, rem lu rem sha hka rai dap,nhprang dap re dap manga na ningbo masha ni hkap hkrum shaga ai hkrum masai.Dai hta lai nna, gasa hpung ni go Lashu hpyen dap nu hpyen du gaba, Yanggung mungdan jammu hpaga mu rapdo, Myen mung lungseng lauban gaba hpe sa jahkrum shaga, Miwa mung Myen mung (Yanggung) ko dap jung ai dat gasa dap, Miwa mung Mandele ko dap jung ai dat gasa dap ran  dap hte Lashu, Mandele, Yanggung ndai myu masum na Miwa mung masha hpung hte hpaga rapdo hta mung sa gawan ma ai. Miwa mung ni arang bang, Myen mung ni arang bang ai sutgan magam dap nkau mi hta sa yu, Myen mung hte Banggali mung jarit Shidui myu mung jarit hpaga gahkan, panglai rai dut gat, sanghpo daru re hta sa jep sagon rai masai.
 Gasa hpung ni shara mi du shagu, dai shara asuya hte Miwa mung masha hpongchyom ni atsang tso ai hku hkap hkungga jo ai hkrum nga ma ai.Myen mung shara lo lo na masha ni Shuili hpe chye, Shuili ko du yu ma ai, shing rai nna Shuili manam ni du sa wa ai nga ai shiga na jang, sa yu mayu, sa hkrum shaga yu mayu rai nga ma ai. Hkuhkau ai masa gata hta, gasa hpung ni go Myen mung seng ang rungdap ni hte mu lam 10 hta myit jom jahkrum da masai: Langai, Myen mung mungdan buhkom dap ni Miwa mung hte Myen mung mungdan jarit buhkom mu hta nga nga ai manghkang lam hparan na ladat jom bong dup  myit hkrum  da masai, dai hta n-ga lungseng, buhkom lam ni majen je hkrat wa na mu hta myit jom jahkrum da masai; Lahkong, Shuili hte  Mandele hkuhkau myu jom go, ya hpang de lahkong maga laili laika hte hpaga yumga maga de grau nna jom galai gachyai hkat  jom pong galo hkrat wa na matu jom myit hkrum da; Masum, Myen mung ni Muje hpe nambat 105 hpaga gahkan hpe Yanggung mungdan hpaga gahkan hte atsang bung ai mungdan pru shang ahko ahkang jo nna, Miwa mung Shuili mungdan tsang hpaga gahkan hte shabung dat nna, lahkong maga hpaga yumga galai gachyai hkat ai hpe shatsong dat na; Mali, Myen mung nhprang dap ni kyet shop ai hte shaning shagu na lung seng lelen gabai poi hpe Muje nambat 105 hta galo nna, Miwa mung de lung seng dut bang ai lam gadun dat nhtom, shalai jahpu shayom dat na; Manga, Shuili hte Muje ya hpang de lung seng hpaga hpe shagrin dat ai lam hta jom pong galo hkrat wa nhtom, lagu dut kang nbang ai lai len hpe jom shakrip hkrat wa na; Kru, Shuili hte Myen mung hkai pang jak mu hpaga rapdo ni Myen mung Shidui myu hta Miwa mung, Myen mung, Banggali mung mungdan     masum hpaga yumga poi hpo na matu hpyi shon la nna, maga masum na hpaga yumga sharot shadut dat na; Sanit, Shuili hpaga gahkan hte Muje nambat 105 hpaga gahkan lawan ai hte lahkong maga hpaga yumga jahtuk sharai hpung gaji hpo la nna, lahkong maga hpaga yumga gatsu hpe laksan hparan ya na; Matsat, Shuili hpaga gahkan hte Muje nambat 105 hpaga gahkan lahkong maga modo gaji mai got shalai, manu shadang maren di na; Jahku, Shuili hte Myen mung mung jarit mayan hta ya hpang de hkaimu, maling mu, nhprang mu maga de na jom pong galo hpe grau nna shangang shakang hkrat wa na; Shi, Shuili myu ni shaga ai majo, Myen mung jak mu hpaga ginra gasa hpung ni gade nna yang Shuili hta jep gawan nna, grau lo ai pong galo hte rot zinghka mu tam la na hku rai nga ai.