ANHTE MUNGDO HTA MUNGDO GINWANG GINWANGDO RE TSANG MASAUM NA PATI RAPDO NI NINGBO LIT GALAI MU HPE HTAP HTUK AI HKU GALO SHANGUT MASAI

Madu dap shiga Anhte mungdo hta, Mungdo, ginwang, ginwangdo re tsang masum na pati rapdo ni ningbo lit galai hprai ai magam mu hpe htap htuk ai hku galo ngut masai. Magam bungli ndai hpe kangka ai hku shangut na matu, mungdo sat lawat jep rapdo ni hkan yu jep hparan ya ma ai.
Daining anhte mungdo hta, mungdo, ginwang, ginwangdo re tsang masum na ningbo lit galai ai go, gabu hpa nan rai nga ai, ganing lo nga yang, magam bungli ndai go logadat hpaji hte ahko ahkang lang hkrat wa na matu, gumrong gumtsa myit jasat hte lam magup hpe hkang hkrat wa na matu, tara hte up hkang hkrat wa na matu re ni hta akyu rong nga ai. Ningbo lit galai ai magam bungli ndai hpe grai kyet shop hkra galo ra nga ai, ndai go mung shawa masha ni tara ko hkan nna gumrong gumtsa ahko ahkang manat na hte seng ai, ningbo ni a hpaji madang hte uphkang madang sharot la hte seng ai, logadat hpaji rot zinghka wa na hte seng ai, hpong shingra simsa ngui pyo wa na hte seng rai nga ai hta n-ga, dai ginra na ja sutgan rot zinghka wa na hte hkaimu gahtong ningnan go maden hkrat wa rai na hte mung seng nga ai.
Mungdo sat lawat jep rapdo ni go, magam yi-ngam gaba, ten gadun, mung masa, tara masa, ubadi masa, lami masa re ni kyin dut ai ko hkan nna, lit galai magam mu hpe yu hkang hkrat wa ai hte hko shabra sharin shaga hkrat wa ai lam hta du du galo ma ai. Mungdo sat lawat jep rapdo ni yu hkang hkrat wa ai majo, tsang shagu na pati rapdo, sat lawat jep rapdo hte hpung hpong chyom ni masat da ai tara shut na lam hta aja awa jep hkrat wa ma ai hte rau, manghkang nga jang  lawan hkan jep sharai ma ai.
Mungdo sat lawat jep rapdo ni ko nna hkan jep sharai ai majo, dai lit galai magam mu hpe pati a ningdo 16 nambat 4 lang zuphpong hta yo shada ai bandung ko du sai hte maren, ginra na pati rapdo ningbo, ningtau ningbo re ni shagrit kau ma ai.